بنجائی وزیر داخلہ محسن نقوی تون یواے ای نا نیشنل اینٹی نارکوٹکس اتھارٹی نا چیئرمین شیخ زید بن حماد بن حمد ان النہیان نا اوڑدہی

اسلام آباد۔ 11 ستمبر (اے پی پی) بنجائی وزیر داخلہ محسن نقوی تون متحدہ عرب امارات نا نیشنل اینٹی نارکوٹکس اتھارٹی نا چیئرمین شیخ زید بن حماد بن حمدان النہیان وزارت داخلہ ٹی اوڑدہی کرے ہراٹی انسداد منشیات تون اوار تین پہ تینی است خواہی نا امور آ سرجمی اٹ گپ وتران مس۔ اوڑدہی ٹی پاکستان و یواے ای منشیات تور انا بابت کمکاری ءِ پین مون آ دننگ آ امنا کریر۔ پاکستان نا کنڈآن ڈی جی اے این ایف میجر جنرل عبدالمعید وخت اس کہ یواے ای نا کنڈآن بریگیڈیئر طاہر غریب ءِ رابطہ آفیسر مقرر کننگ نا فیصلہ کننگا تانکہ عملی کہول آ ہڑتوم آملک آتا نیام اٹ مربوط کمکاری ءِ پک کننگ مرے۔ بنجائی وزیر داخلہ محسن نقوی متحدہ عرب امارات اٹی نیشنل اینٹی نارکوٹکس اتھارٹی نا جوڑ کننگ نا ستاءِ کرسا شیخ زید بن حماد بن حمدان النہیان ءِ اتھارٹی نا اولیکو چیئرمین جوڑ مننگ آمبارکبادی تس۔ اوپارے کہ دا اتھارٹی نا جوڑ مننگ آن ہڑتوم آملک آتا نیام اٹ منشیات تور انا بشخ اٹی کمکاری پین سوگو مریک۔ محسن نقوی پارے کہ پاکستان منشیات نا برخلاف جنگ اٹی ہراول دستہ نا کڑد ءِ ادا کننگ ءِ و مکروہ کاروبار اٹی اوار زموار آتا برخلاف آہنی دوتے اٹ مون تننگ انگ ءِ۔ اوپارے کہ متحدہ عرب امارات اٹی انسداد منشیات نا کارروائی تیٹی 400 دوبہ دار آتے دزگیرکننگا وخت اس کہ 5 ٹن منشیات ہلنگا ہرا وخت آ معلومداری نا ہل و تس و اسیجائی کوشست آتیان ممکن مس۔ بنجائی وزیر داخلہ اعتراف کرے کہ ساڑی آ وخت اٹی سنتھیٹک ڈرگ آتا اسمگلنگ اٹی ودکی مسنے ولے دامافیا نا برخلاف پبی کریک ڈاؤن برجاءِ۔ اوپارے کہ ’’منشیات نا برخلاف جنگ اصل اٹ ننا چین تا رکھ انا جنگ ءِ و اوٹی ہارہچ ءُ آپشن اس اف ‘‘۔ شیخ زید بن حماد بن حمدان النہیان پاکستان نا کڑد انا ستاءِ کرسا پارے کہ یواے ای انسداد منشیات نا رداٹ ہرممکن کمک فراوان کیک۔ اونا پاننگ ئس کہ تین پہ تینی شریداری ءِ پین سوگو کرسا نن بروک آ چین تے منشیات آن پاک روشنا آخبت اس تننگ کینہ۔ داوخت آ یواے ای نا بڑزکو کہولی ڈل ہم ساڑی ئس ہراٹی بریگیڈیئر طاہر غریب، بریگیڈیئر عمرخلفان، بریگیڈیئر خالد علی، بریگیڈیئر ابراہیم جاسم ، بریگیڈیئر ماجد سلطان، کرنل محمد ماجد، کرنل خالد راشد، لیفٹیننٹ کرنل جمال سعید ، لیفٹیننٹ کرنل سعید محمد، میجر محمد سلطان و کیپٹن سالم خمیس ئسک اوار ئسر۔ پاکستان نا کنڈآن وزیر مملکت داخلہ طلال چوہدری، بنجائی سیکرٹری داخلہ، اسپیشل سیکرٹری داخلہ ، ایڈیشنل سیکرٹریز داخلہ ڈی جی اینٹی نارکوٹکس فورس و ایلو سینئر کمامدارآک ہم دیوان اٹی بشخ ہلکر۔