مزن وزیر محمد شہباز شریف گتر ءِ بنجاھی شہر دوحہ ءَ سر بوتگ

دوحہ۔11ستمبر  (اے پی پی): مزن وزیر محمد شہباز شریف گتر ءِ بنجاھی شہر دوحہ ءَ سر بوتگ۔ گتر ءِ نائب مزن وزیر ءُ دیمپانی ءِ وزیر مملکت شیخ سعود بن عبدالرحمن بن حسن الثانی ءَ دوحہ ءِ بالی پٹ ءَ مزن وزیر ءِ وش اتک کتگ۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ نائب مزن وزیر ءُ دری کارانی وزیر محمد اسحاق ڈار، دیمپانی ءِ وزیر خواجہ محمد آصف، اھوالکاری ءُ شنگ کاری ءِ وزیر عطا اللہ تارڑ ءُ ھاسیں کمکار طارق فاطمی مزن وزیر ءِ  ھمراھی ءَ ھوار انت۔ یک روچی سرکاری تر ءُ تاب ءِ ساھت ءَ مزن وزیر گتر ءِ امیر شیخ تمیم بن حمد الثانی ءَ گوں گند ءُ نند کنت ۔ مزن وزیر دوحہ ءِ سر ءَ اسرائیل ءِ بے جاہیں زوراکی ءُ اے اُرش ءِ درگت ءَ گتر ءِ امیر ءُ الس ءِ گوما یکوئی ءِ درشان کنت کہ اے اُرش چہ میاں اوستمانی کانود ءِ ھلاپ ءَ ھاسیں رنگ ءَ اِنت۔ بیان ءِ رد ءَ گتر ءُ پاکستان ءِ نیام ءَ دیریں راجدپتری براتی سیادی است انت کہ ایشی ءِ بنیات یکجائی  دل یکیمی  ءُ شرپ  ءُ ازت آنی  سر ءَ انت۔ پاکستان ءَ ہر مشکلیں ساھت ءَ مدام گتر ءِ کمک کتگ ءُ دیم ءَ ھم کنت، اے گپ ءِ درشان ءَ مزن وزیر امیر گتر ءِ گوما گند ءُ نند ءَ کنت۔ اے دیوان ءَ اسرائیل ءِ بے جاہیں اُرش ءُ دمگ ءِ جتا جتائیں ملکانی سر ءَ برجاھیں زوراکی ءُ ھمے رنگ ءَ دمگ ءَ امن ءِ برجائی ءِ سر ءَ گپ ءُ تران کنگ بیت۔