سیکورٹی فورس آتا مسہ جتا جتا آپریشن آتیٹی بھارتی پراکسی فتنۃ الخوارج آن تعلق تخوک آ 19 خوارج آتے جہنمی کننگا، آئی ایس پی آر

راولپنڈی۔ 11 ستمبر (اے پی پی) 9 و 10 ستمبر آ خیبرپختونخوا نا چندی علاقہ غاتیٹی سیکورٹی فورس آتا مسہ جتا جتا آپریشن آتیٹی بھارتی پراکسی ’’فتنۃ الخوارج‘‘ آن تعلق تخوک آ 19 خوارج آتے جہنمی کننگا۔ آئی ایس پی آر نا کنڈآن جاری پریس ریلیز نا رداٹ فتنۃ الخوارج نا ساڑی گری نا حوال آ سیکورٹی فورس آک ضلع مہمند نا علاقہ گلونوں ٹی انٹیلی جنس نا بنداو آ آپریشن کریر ۔ کارروائی ٹی سیکورٹی فورس آک خوارج آتا ٹھکانہ ءِ گچین وڑاٹ شست کریر و اسہ ایلو آ ترند سم کاری آن پد بھارت نا مخ تف 14 خوارج آتے جہنمی کننگا۔ ہنداوڑنا اسہ پین انٹیلی جنس بیسڈ آپریشن قطبی وزیرستان نا عمومی علاقہ دتہ خیل اٹی کننگا ہراڑے اسہ ایلو آ سم کاری ٹی پین 4 خوارج سیکورٹی فورس آتا دوتے اٹ انجام آ سرمسر۔ ضلع بنوں ٹی مروک آ اسہ پین مقابلہ سے ٹی اسہ خارجی اسے سیکورٹی فورس آک جہنمی کریر۔بھارت نا مخ تف دا ہلاک مروک خوارج آتیان سلہہ و گولہ بارود ہم دوئی کننگانے۔ آئی ایس پی آر نا رداٹ دا دہشت گرد آک علاقہ ٹی چندی دہشت گرد کارروائی تیٹی اوار ئسرہ۔ علاقہ ٹی پین ماندہ خارجی تا چٹفنگ کن کلیئرنس و سرچ آپریشن برجاءِ انتئے کہ پاکستان نا سیکورٹی فورس آک ملک آن بھارتی مخ تف  دہشت گردی نا ناسور ءِ ماس کش کننگ کن سنبرینگوک ءُ ۔