ٹیکٹر سازی نا پالیسی ٹی تعلقدار شریدار آتون سلابت ءِ پک کننگک، خصوصی کمکار ہارون اخترخان

اسلام آباد۔ 11 ستمبر (اے پی پی) وزیراعظم نا خصوصی کمکار صنعت و پیدوار ہارون اخترخان پارینے کہ ٹیکٹر سازی نا تیاری ٹی غٹ تعلقدار شریدار آتون سلابت ءِ پک کننگ نا گرج ءِ۔ اوداہیت ءِ پنچ شنبے نادے آ داڑے ملت ٹیکٹر آتا چیف ایگزیکٹیو آفیسر آتون اوڑدہی ٹی پارے ہراٹی جوان ٹیکٹر پالیسی نا تیاری آ گپ وتران کننگا۔ اوڑدہی ٹی ریگولیٹری ڈیوٹیز، برآمدات و ٹیکٹر انڈسٹری ءِ مون تروک ویل آتیا ہم سرجمی اٹ گپ وتران مس۔ ہارون اخترخان پارے کہ وزیراعظم محمد شہباز شریف نا وژن نا رداٹ زوت آتے اٹ ہی تیارکروک آ صنعتی پالیسی آن پد داسہ ٹیکٹر پالیسی بروک آ گا م مریک۔ اوداہیت آ زور شاغا کہ پالیسی سازی نا عمل اٹی غٹ اسٹیک ہولڈر آتے اوار کننگک تانکہ پالیسی جوان و گچین مرے۔ ٹیکٹر انڈسٹری نا اہمیت ءِ تالان کرسا ہارون اخترخان پارے کہ دا بزغر و پاکستان نا کشاری زرگزران کن تمبہ نا حیثیت تخک۔ اوباورکرفے کہ دا پالیسی اسٹیک ہولڈر آتا سلابت اٹ و جہانی آب انا رداٹ تیار کننگک۔ ٹیکٹر انڈسٹری نا ویل آتا پائیدار ایسری بیرہ مریس مدی پالیسی فریم ورک اٹی ءِ۔ ہارون اخترخان پارے کہ وزیراعظم محمد شہباز شریف نا پارت آ پاکستان پوسکن آ صنعتی انقلاب نا کنڈآ ہِننگ ءِ۔