او آئی سی ءِ دیوان ءَ قطر ءِ دارالحکومت دوحہ ءِ سر ءَ اسرائیل ءِ اُرش ءِ سک باز مذمت

جدہ ۔10ستمبر  (اے پی پی): اسلامی کمک ءِ گل ءَ قطر ءِ بنجاھی شھر دوحہ ءِ سر ءَ اسرائیل ءِ زوراکی ءِ سک باز مذمت کتگ ءُ اے زوراکی ءَ را میاں اوستمانی کانود، اقوام متحدہ ءِ منشور ءُ جھان ءِ رھبندانی پدّریں ھلاپ ورزی لیک اِتگ۔ او آئی سی ءَ گوستگیں روچ ءَ جاڑی بوتگیں بیان ءِ تہ ءَ دوحہ ءِ سر ءَ اسرائیل ءِ اُرش ءَ را یک مزنیں آشوبے لیک اِتگ کہ ایشی ءَ چہ دمگی ایمنی ءُ برجائی ءَ را ھترہ ءِ دیم ءَ کیت ءُ جھان ءِ امن ءُ ایمنی ءَ را ھراب کنت۔ اسلامی ملکاں قطر ءِ حاکمیت، ایمنی ءُ سرزمین ءِ یکوئی ءِ سرا اسرائیل ءِ پدریں تجاوز ءِ مذمت ءُ رد کتگ۔ او آئی سی ءِ سیکرٹری جنرل ءَ یک رندے پدا گوشت کہ اے گل ءِ منشور، اسلامی سروک دیوان ءِ منوگری ءُ دری کارانی کونسل ءِ پیسلہ آنی رد ءَ ھرچ باسکیں ملک ءِ حاکمیت ءُ ایمنی ءِ ھلاپ ءَ ھرچ وڑیں تجاوزات ءَ را سدکیں رنگ ءَ رد کنت۔ او آئی سی ءَ قطر ءِ گوما سرجمیں یکوئی ءِ درشانی کتگ ءُ آئی ءِ ایمنی، علاقائی یکوئی، برجائی ءُ وتی شہری ءُ مہلوک ءِ ایمنی ءِ واستہ سرجمیں کمک ءِ درشانی کتگ۔ اے گل ءَ قطر ءِ نیمگ ءَ چہ وتی حاکمیت ءُ ایمنی ءِ رکھینگ ءِ ھاترا کتگیں درستیں گامگیج آنی حمایت ءِ ھم پدر کتگ۔ او آئی سی ءَ یک رندے پدا میاں اوستمانی براتی ءَ چہ ھاسیں رنگ ءَ اقوام متحدہ ءِ سلامتی کونسل ءَ لوٹ کتگ کہ آ وتی ذمہ واریاں پیلو بہ کنت ءُ اسرائیل ءَ را مجبور بہ کنت کہ آ دمگ ءَ وتی برجاھیں ءُ سنگینیں زوراکی ءَ را ھلاس بہ کنت ءُ میان استمانی کانود ءُ ھمگرنچیں میان استمانی منوگریانی رد ءَ عمل بہ کنت۔