چیئرمین سینیٹ تون آسیان انٹرپارلیمانی اسمبلی نا سیکرٹری جنرل نا اوڑدہی

اسلام آباد۔ 10 ستمبر (اے پی پی) چیئرمین سینیٹ سید یوسف رضاگیلانی تون آسیان انٹرپارلیمانی اسمبلی (اے آئی پی اے) نا سیکرٹری جنرل نا اوڑدہی ٹی ڈیہہ اٹی امن، شونداری و پارلیمانی کمکاری نا مون آ دننگ آ امناو ڈیجیٹل اکانومی، قابل تجدید توانائی، موسمیاتی تغیر نا اثر، تعلیم و انفراسٹڑکچر نا بشخ آتیٹی کمکاری ءِ ودفنگ نا گمان تیا ہم سرجمی اٹ گپ وتران کننگا۔ چارشنبے نادے آ سینیٹ سیکرٹریٹ آن جاری بیان نا رداٹ چیئرمین سینیٹ سید یوسف رضاگیلانی تون اونا ہنکین آ آسیان انٹرپارلیمانی اسمبلی (اے آئی پی اے) نا سیکرٹری جنرل آرستی روزائمیر یانتی داتو حاجی عبدالرحمان اوڑدہی کرے۔ سید یوسف رضاگیلانی سیکرٹری جنرل ءِ بخیر کرسا پاکستانی الس و سینیٹ نا کنڈآن نیک است خواہی نا درشانی ءِ کرے۔ اوشرفمند آ مہمان ءِ اے آئی پی اے نا اولیکو زالبول سیکرٹری جنرل گچین مننگ و انجینئرنگ و شونداری نا بشخ اٹی نمان خذمت آتیا آسیان فیڈریشن آف انجینئرنگ آرگنائزیشنز نا کنڈآن ’’آنریری فیلو ایوارڈ‘‘ دوئی کننگ آمبارکبادی تس۔ چیئرمین سینیٹ پاکستان و آسیان نا متکن آ تعلقداری تے مون آتخسا پارے کہ پاکستان 1993ء ٹی آسیان نا ’’سیکٹورل ڈائیلاگ پارٹنر‘‘ جوڑ مسوسس و اوکان پد اسیجائی کمکاری نا دنگ ’’آسیان۔ پاکستان جوائنٹ سیکٹورل کوآپریشن کمیٹی (AP-JACC)نا رداٹ پین وسیع مس۔ اوپارے کہ پاکستان 2022ء ٹی اے آئی پی اے نا ’’آبزرور‘‘ جوڑ مس و ہموتم آن ہرسال اونادیوان و فورم تیٹی پبی بشخ ہلنگ ءِ۔ چیئرمین سینیٹ سیکرٹری جنرل ءِ ’’انٹر پارلیمنٹری اسپیکرز کانفرنس (آئی ایس سی)‘‘ نا جوڑ کننگ آن ہم معلومدار کرے، ہرا برجاسال سیئول اٹی اونا کماشی ٹی جوڑ مس۔ داپلیٹ فارم تین پہ تینی انحصار، اسیجائی شونہالی و آفاتی قدر انا اصول آتیا تالان ءِ، ہرانا مسخت جہانی پارلیمانی گپ وتران و اسیجائی ویل آتا ایسری ءِ مون آدننگ ءِ۔ اوپارے کہ پاکستان نومبر اٹی اسلام آباد اٹی آئی ایس سی نا اولیکو دیوان اڈ ایتک ہرانا سرحال ’’امن ، سوگوی و شونداری‘‘ ءِ۔