زرگزران نا اہم ٹک آک سہی سمت آہِننگ ءُ، بنجائی وزیر خزانہ نا پاکستان بزنس کونسل نا ڈل اتون اوڑدہی

اسلام آباد۔ 10 ستمبر (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ حکومت آجوزرگزران نا سوگوی ءِ برقرار تخنگ کن سنبرینگوک ءِ ، کاروبار وزرکاری کن سازگار چاگڑد ودی کننگ آ چکار کننگ ءِ، وزیراعظم نا ساڑی آ دورہ ءِ چین آن ہڑتوم آ کنڈآتا زرگزرانی تعلقداری تے پین مون آ دننگ دوئی مریک، افراط زر ءِ قابوٹی تخنگ کن گچین چاروکی کننگ انگ ءِ ۔ اوداہیت ءِ چارشنبے نادے آ داڑے پاکستان بزنس کونسل نا ڈل اتون اوڑدہی ٹی پارے۔ ڈل انا کماشی ءِ کونسل نا چیف ایگزیکٹیو آفیسر جاوید قریشی و چیئرپرسن ڈاکٹر زیلاف منیر کریکہ۔ وزیرخزانہ ڈل ءِ بخیرکرے واوفتے پاکستان نا ساڑی زرگزرانی حالیت آتا بارواٹی حوال تس۔ اوپارے کہ زرگزران نا اہم ٹک آک سہی سمت آ ہِننگ ءُ۔ وزیرخزانہ ریاستی ملکیتی ادارہ غاتیٹی اصلاحات ، نجکاری پروگرام و السی بشخ ءِ گچین کننگ تون اوار حکومت نا اصلاحات نا ایجنڈا نا ذکر ءِ کرے و پارے کہ دا گام گیج آتیان مریس مدی سوگوی کن بنداو فراوان مننگ ءِ۔ اوزرگزرانی سوگوی نا اہمیت آ زور شاغسا شرح مبادلہ و پالیسی ریٹ اٹی سوگوی نا ذکر ءِ ہم کرے و پارے کہ دا رجحان تا آخبت اٹی ہم برجاسلنگ نا گمان ءِ ہر املک اٹی مریس مدی زرگزرانی سوگوی کن المی ءِ۔ اوپارے کہ حکومت آجوزرگزران نا سوگوی ءِ برقرار تخنگ کن سنبرینگوک ءِ و کاروبار و زرکاری کن سازگار چاگڑد ودی کننگ آ چکار کننگ ءِ۔ اوبندرگاہ، سڑک و ریلوائی نا بنداوی پنجر ءِ پوسکن کننگ نا اہمیت آ زور شاغا و پارے کہ داڑآن ملکی واپار ءِ مون آ دننگ و برآمدی وارخواہی تیٹی ودکی اتنگ مریک۔ وزیرخزانہ ڈل ءِ امریکہ تون برجاٹیرف مذاکرات نا بارواٹی معلومدار کرے ہرافتیان پاکستانی برآمد کنندگان تے ڈیہہ اٹی مون آ بروک مسابقتی فائدہ غاتا بنداو آاہم وارخواہی دوئی مننگ کیک۔ اوپاکستان بزنس کونسل و ایلو نمائندہ تنظیم تیا زور شاغا کہ او ہڑتوم آ کنڈآتا واپار و زرکاری نا مون آدننگ کن کاروباری ادارہ غاتا نیام اٹ براہ راست رابطہ غاتے مون آ دننگ اٹ قائدانہ کڑد ادا کیر۔