پاکستان ایس ایم ایز ءِ پائیدار شونداری نا انجن و اسہ جوان صنعتی انقلاب اسے نا محرک اٹی بدل کننگ کن سنبرینگوک ءِ، ہارون اخترخان

اسلام آباد۔ 10 ستمبر (اے پی پی) وزیراعظم نا خصوصی کمکار صنعت وپیداوار ہارون اخترخان پارینے کہ وزیراعظم محمد شہباز شریف نا وژن نا رداٹ پاکستان چنکا و نیامی درجہ نا کاروبار (ایس ایم ایز) ءِ پائیدار شونداری نا انجن و اسہ جوان صنعتی انقلاب نا محرک اٹ بدل کننگ کن سنبرینگوک ءِ، پدتموک زرگزران تیٹی ایس ایم ایز جم قومی پیدوار نا کم و ود 40 درسد بشخ فراوان کننگ ءِ، روزگار نا وارخواہی ودی کننگ، جدت اتنگ و نیزگاری ءِ کم کننگ کن ایس ایم ایز نا سوگوی المی ءِ۔ اوداہیت ءِ ڈی۔8 ایس ایم ای گورنمنٹل باڈیز دیوان نا اولیکو ورچوئل سیشن و ہشت می باضابطہ دیوان اٹی بشخ ہلنگ نا وخت آپارے۔ دیوان اٹی سیکرٹری صنعت وپیدوار سیف انجم و سی ای او سمیڈا سوقرات امان ہم ساڑی ئس۔ ہارون اخترخان پارے کہ ایس ایم ایز ننا زرگزران نا تمبہ و علاقائی زرگزرانی انضمام نا بنداو ءِ، پاکستان نا ایس ایم ایز خاص کر ٹیکسٹائل، سرجیکل، آئی ٹی و گوازی تا بشخ آتیٹی کاریم کروک آ ایس ایم ایز جہانی کہول آ امنا مروک ءِ و نن اونا مسابقت ءِ ودفنگ کن سنبرینگوک اُن۔ اوپارے کہ مالی وسیلہ غاتا کمتی ، ٹیکنالوجی نا خلاء و مارکیٹ اسکان رسینگ بھلو چیلنج ءُ ولے اجتماعی کوشست آتیان نن دا اڑاند آتے وارخواہی تیٹی بدل کننگ کینہ۔ اوپارے کہ پاکستان تینا ایس ایم ایز پالیسی تے جہانی آب انا رداٹ جوڑ کننگ، شمولیت ءِ پک کننگ و غٹ اسٹیک ہولڈر آتے اوار کننگ کن سنبرینگوک ءِ۔