وزیراعظم محمد شہباز شریف نا امریکہ تون تعلقداری تے ودفنگ و چین اتون تزویراتی شریداری ءِ سوگو کننگ نا عزم انا درشان، کشاری وموسمیاتی ایمرجنسی ءِ نافذ کننگ نا پڑو

اسلام آباد۔ 10 ستمبر (اے پی پی) وزیراعظم محمد شہباز شریف امریکہ تون تعلقداری تے ودفنگ و چین اتون تزویراتی شریداری ءِ سوگو کننگ نا عزم انا درشانی ءِ کرساپارینے کہ چین آن 8 ءُ نیم ارب ڈالر نا اسیجائی ڈٹ و امریکہ تون کانڑکنی و معدنیات نا بشخ اٹی بھلو زرکاری اسے کن ایم اویوز ستاکڑزک، دا ڈٹ آتیا عملدرآمد اٹی تاخیر، لاپرواہی و ڈیوالئی ءِ سگنگ پننگک، دہشت گردی نا بیخ ءِ کشنگ قومی وملی فرض ءِ، نوکاپ آن بھلو کچ اسے آ بھسکاری مس، موسمیاتی وکشاری ایمرجنسی نافذ کننگ انگ ءِ۔ داخیال آتا درشانی ءِ او چارشنبے نادے آ بنجائی کابینہ نا دیوان آن تران کرسا کرے۔ اوبنجائی کابینہہ ءِ پارے کہ درو ای جی ایچ کیو ٹی پاک فوج انا بہادر آفیسر میجر عدنان اسلم ہرا فتنۃ الخوارج آتا جوانمردی اٹ مقابلہ ءِ کرسا شہیدی نا جام ءِ نوش کرے، نا نماز ءِ جنازہ ٹی بشخ ہلکٹ۔ داوخت آ اونا باوہ و خاہوت نا ایلو بندغ آتون ہم اوڑدہی مس، شہید اناباوہ بھاز جوزہ غان سرشار ئس۔ اوآرمی چیف فیلڈ مارشل جنرل سید عاصم منیر نا ساڑی گری ٹی کنے پارے کہ اودے تینا مار انا شہیدی آ گمر ءِ، اونا مالم ہم ہنداوڑنا جوزہ غاتا درشانی ءِ کرے حتیٰ کہ اونا ایڑھک ہم پاریر کہ ننا ایلم عظیم ءُ قربانی ا س تسنے، شہید انا خاہوت ہم لمہ وطن کن قربانی تننگ ناجوزہ نا درشانی ءِ کریر۔ وزیراعظم پارے کہ دا جوزہ بیرہ میجر عدنان اسلم شہید نا خاہوت نا آخا بلکن پاک فوج انا غٹ آفیسر و ورناک ہندا جوزہ غان سرشار ءُ و اوفک قربانی نا بے مٹ تاریخ اس نوشتہ کرینو، پاکستانی قوم تینا شہید آتا قربانی تیا گمر کیک، مچ آ قوم شہید ، غازی و اوفتا خاہوت آتے خراج تحسین پیش کیک۔ وزیراعظم پارے کہ گڑاس مخلوق دا قربانی تا سوشل میڈیا غا ہراوڑ تضحیک ءِ کننگ ءُ اوفتا اخس کہ مذمت ءِ کننگے کم ءِ، پاکستان ءِ فتنۃ الخوارج آتیان نجات ترفنگ کن ہراعظیم قربانی تے تننگ انگ ءِ اوفتا بایدے ادراک مرے، دا فتنہ نا بیخ ءِ کشنگتو تو پاکستان تون داکان بھلو ہچ ءُ ظلم اس مفک، داننا قومی و ملی فرض ءِ کہ دا فتنہ ءِ ماس کش کننگے، پاکستان نا فوج و اونا سرکڑدہ غاتے ہراوڑ سوشل میڈیا غا شست کننگ انگ ءِ داناقابل سگ ءِ، اوفتا کاٹم ءِ لتاڑوئی مریک۔ وزیراعظم بحری امور نا وزیر جنید انوار چوہدری نا لمہ، وزیر مملکت رشید ملک نا بھلاایلم، مسکوہی چیئرمین سینیٹ صادق سنجرانی نا باوہ نا کزیت آ است ہسونی نا درشانی ءِ کرسا ایماندار تیکن دعاپاتیا کرفے۔ وزیراعظم دورہ ءِ چین آ کابینہ ءِ پت اٹی ہلسا پارے کہ نائب وزیراعظم ، تعلقدار وزیر آک و ایس آئی ایف سی نا کمامدارآتون حکومتی ٹیم انا کوشست آتیٹی چین نا دورہ  بے کچ سرسہب مس و بزنس کانفرنس شاندار اڈ ہلک ، ننے داباندات آپدریسہ و پین پیش رفت کروئی مریک۔ دا چرجوئی ٹی ڈیوالئی، تاخیریا  لاپرواہی قابل قبول و سگنگ پننگک۔ وزیراعظم پارے کہ چین دنیا نا اسہ واکدار عسکری و زرگزرانی واک اس جوڑ مسنے ہرانا درشانی شاندار فوجی پریڈ اٹی ہم مون  آبس۔ وزیراعظم پارے کہ دورہ ءِ چین اٹی ایس سی او دیوان اٹی بشخ ہلنگ و ہڑتوم آ کنڈآتا اوڑدہی کریٹ، سی پیک فیز ٹو انا خدوخال، کشت وکشار، بی ٹو بی زرکاری، اسپیشل اکنامک زون و قراقرم ہائی وے انا فنانشل ماڈل آتا پڑو ءِ کننگک، 85 درسد چینی زرکاری وخت اس کہ 15 درسد پاکستانی زرکاری مریک، 26 ستمبر آبنجائی وزیر احسن اقبال چین آ کاہک و ہموڑے سی پیک 2.0 نا ارٹ میکو ریسہ نا ڈٹ آتا پڑو مریک۔ وزیراعظم پارے کہ چین اٹی بزنس ایونٹ اٹی 8ءُ نیم ارب ڈالر نا پڑومس، داٹی جوائنٹ وینچرز و ایم اویوز ہڑتوم آک اوار ءُ۔ وزیراعظم کابینہ ءِ پارے کہ تدوک آ دے امریکی کمپنی تتون ہم ایم اویوز آ دستخط کرینن ہرانا رداٹ مائنز اینڈ منرلز خاص کر جیمز اینڈ سٹونز نا بابت امریکی زرکاری بریک، پاکستان اٹی گلگت بلتستان ، چترال و بلوچستان تون اوار کیہی علاقہ غاتیٹی منرلز نا خزانہ ساڑی ءِ ہرافتے کشنگ کن بھلو امریکی زرکاری اس بریک۔ وزیراعظم پارے کہ حکومت امریکہ تون تعلقداری تا مون آ دننگ کن دے و نن کوشست کننگ ءِ ، ننے امریکہ تون ہم گچین تعلقداری استوار کروئی ءِ و چین اتون تینا تزویراتی شریداری ءِ ہم سوگو کروئی ءِ، 2015-16ٹی نوازشریف نا حکومت اٹی نن ایل این جی نا 5 پلانٹ خلکن ہرافتیان 4 امریکن کمپنی و اسہ سیمنز ءِ ملا۔ دا کمپنی تا بڑزکو عہدیدار آک پاریر کہ داخہ شفاف پروکیورمنٹ پروسیجر دنیا ٹی اسہ جاگہ اس ہم خنتنون، دادنیا نا غٹ آن اڑزان پلانٹس ئسر و ہرا مشینری نصب کننگا او جدید ترین ئسر، ایمانداری و خواری ہی پن کٹنگ نا اسٹ انگا وڑ ءِ۔ وزیراعظم پارے کہ نوکاپ پاکستان اٹی گلگت بلتستان، آزاد کشمیر، خیبرپختونخواوپنجاب اٹی بھلو کچ اسے آ بھسکاری کرینے، داسہ نوکاپی دیر سندھ اٹی ہم پترینگانے۔ اوپارے کہ چاگڑدی بدلی تون مون تننگ کن پروگرام ءِ گڈیکو دروشم اس تروئی مریک، دا بھاز بھلو چیلنج اسے، پاکستان تنیا داڑتون مون تننگ کپک، دا چرجوئی ٹی روڈ میپ اس جوڑ کروئی مریک۔ وزیراعظم پارے کہ نوکاپ آن مروک آ نسخان تا کساس ءِ خلنگ کن زمواری تننگانے، بروک آ ہفتہ ٹی حساب وکتاب و سرجم آک مون آ بریرہ، برنج، مکئی ، گنڈیری و کرپاس تون اوار بھلو کچ اسے آ فصل آتے نسخان مسنے ہرافتا سہی کساس ءِ خلنگ انگ ءِ، دا باندات بنجائی کابینہ ٹی ہم اتینہ، نوکاپ اٹی اسہ ہزار نا خڑک پاکستانی نرینہ، زالبول و چناتینا جون آن دوتے سلانو، ہزار آ مخلوق ٹھپی ءُ و ہزار آ ایکڑ ڈغار دِیراٹی ءُ۔ وزیراعظم دعاکرے سندھ اٹی نوکاپ آن کم آن کم نسخانات مرے۔ وزیراعظم ملک اٹی چاگڑدی و کشاری ایمرجنسی نا پڑو کرساپارے  کہ بنجائی کابینہ احسن اقبال نا کماشی ٹی کمیٹی اس جوڑ کننگ ءِ ہراٹی تعلقدار وزیرآک و سیکرٹریک اوار مریرہ، چیف سیکرٹریک ہم کمیٹی نا بشخ مریرہ۔ ایپکس کمیٹی نا دیوان ءِ ہم بٹنگک ہراٹی ہر چار آصوبائی وزیراعلیٰ و تعلقدار آفیسر آک ہم ساڑی مریرہ، بنجاوصوبہ غاتے اواری اٹ حالیت آتون مون تننگ و نسخان تا ازالہ ءِ کروئی مریک۔ وزیراعظم قطر اٹی اسرائیل نا سفاکانہ جلہو نا ترندی اٹ مذمتءِ کرسا پارے کہ اسرائیل قطر انا سالمیت و وتواجہی آ جلہو کرینے، فلسطین اٹی بے گناہ چنا، بزرگ ، ورناو نرینہ غاتا دتر ءِ وہیفنگ انگ ءِ، دنیا نا تاریخ اٹی دا کشت وخون نا درور ملیپک۔ وزیراعظم پارے کہ نائب وزیراعظم داحالیت آتیا درو بیان اس جاری کرے، ای قطر انا امیر تون تینٹ حالیت آتیا ہیت کرینٹ۔ اوپاکستان نا حکومت و الس نا مشکل وخت اٹی یکجہتی نا درشانی آ منت واری ءِ ہرفے ، نن اوفتے باور کرفنہ کہ نن اوفتے تون سلنہ۔