ورلڈ بینک ءِ ڈل ءَ وفاقی وزیر محمد معین وٹو ءَ گوں گند ءُ نند کت، پاکستان ءِ آپ ءِ جیڈھ، سیلاب ءِ ھترہ، آپی وسیلگ ءِ رکھینگ ءُ کمک ءَ را گیش کنگ ءِ سر ءَ گپ ءُ تران کت

اسلام آباد۔9ستمبر  (اے پی پی):ورلڈ بینک ءِ ڈل ءَ آبی وسیلگ آنی وفاقی وزیر محمد معین وٹو ءَ گوں گند ءُ نند کت۔ ڈل ءِ سروکی مسکرم برہان ءَ کتگ ات کہ آ ورلڈ بینک ءِ میاں اوستمانی، شمالی افریقہ، اوگانستان ءُ پاکستان ءِ دمگی ڈائریکٹر انت۔ وزارت آبی وسائل ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ دوئیں نیمگ ءَ پاکستان ءِ آپ ءِ جیڈھ، سیلاب ءِ ھترہ، آپ ءِ کمیگی، آبی وسائل ءِ رکھینگ ءُ کمک ءَ را گیش کنگ ءِ سر ءَ گپ ءُ تران کنگ بوتگ۔ اے موہ ءِ سر ءَ وزارت آبی وسائل ءِ مزنیں کارندہ ءُ ورلڈ بینک ءِ کارندہ ھم ساڑی بوتگ اَنت۔ وفاقی وزیر ءَ پاکستان ءَ آپ ءِ شوبگ ءَ ورلڈ بینک ءِ دراجیں ءُ جوانیں کمک ءِ توسیپ کت ءُ گوشت کہ ورلڈ بینک ءَ مدام مشکلیں وھد ءَ ھاسیں رنگ ءَ قدرتی آفت ءُ سیلاب ءِ وھد ءَ پاکستان ءِ کمک کتگ۔ آئی ءَ اے گپ ءِ سر ءَ زور پر دات کہ وفاقی ءُ صوبائی حکومت، ورلڈ بینک ءُ ایندگر میاں اوستمانی شریک آنی نیام ءَ سیلاب ءِ تہ ءَ گیشی، گلیشیر آنی پگھل بوھگ، نا متوقع ھور ءُ آپ ءِ کمی ءِ وڑیں سنگینیں جیڈھ آناں گیواری ءِ واستہ المی اِنت۔ آئی ءَ گوشت کہ ایوک ءَ انفراسٹرکچر ءِ جوڑیشت ءَ را سرجمی نہ بیت، بلے جوانیں پالیشی سازی، نوکیں ٹیکنالوجی ءِ کارمرد کنگ ءُ آپی وسیلگ آنی گہتریں انتظامی ءِ وسیلگ ءَ برجمیں آسراتی رسگ ءَ انت۔ مسکریم برحانے ءَ گوستگیں روچاں خیبر پختونخوا ءُ پنجاب ءَ بوتگیں سیلاب ءِ سبب ءَ جانی ءُ مال ءِ تاوان ءِ سرا اپسوز ءِ درشانی کتگ۔ وفاقی ءُ صوبائی حکومت ءِ نیام ءَ گہتریں رابطہ ءُ منصوبگ بندی ءِ وسیلگ ءَ اے رنگیں جیڈھ آناں کم کنگ بوت کنت۔ وفاقی وزیر موین وٹو ءَ گوشت کہ راجی سیلاب ءِ رکھینگ ءِ منصوبگ چہارم ءَ ھما گامگیج ھوار اَنت کہ آ ورلڈ بینک ءِ پروگرام ءِ رد ءَ اَنت۔ ورلڈ بینک ءَ دل یکیمی داتگ کہ آ سیلاب ءَ چہ آماچیں دمگ آنی تہ ءَ ھرابیں ڈھانچگ آنی جوڑیشت ءُ مھکمیں بنیاتی ڈھانچگ ءِ جوڑیشت ءِ سر ءَ سرجمیں رنگ ءَ کمک کنت۔ گند ءُ نند ءَ کشت ءُ کشاری آپ ءِ جوانیں رنگ ءَ کارمرد کنگ ءُ زوال ءِ تہ ءَ کمی ءِ سر ءَ ھم زور پر دیگ بوت۔ وزارت ءِ ایڈیشنل سیکرٹری ءَ گوشت کہ راجی آپی پالیشی ءِ تہ ءَ 2030ءَ تاں آپ ءِ زوال ءِ تہ ءَ 33درسد کمی ءِ ٹارگٹ اِنت۔دوئیں نیمگ ءَ پیسلہ کنگ بوتگ کہ آیوکیں گند ءُ نند آنی تہ ءَ آپ ءِ جوانیں کارمردی ءُ جوانیں انتظامی ءِ واستہ عملی منصوبگ جوڑ کنگ بنت۔