صدر ءِ مملکت آصف علی زرداری ءَ میجر عدنان اسلم شہید ءَ را یات کنائینتگ

اسلام آباد۔9ستمبر  (اے پی پی):‎ صدر ءِ مملکت آصف علی زرداری ءَ میجر عدنان اسلم شہید ءَ را شگر ءُ منت گپت ءُ گوشت کہ آئی ءَ ناشرکارانی ھلاپ ءَ بھادری ءَ گوں جنگ کتگ، شھید آنی قربانی بے سوب نہ رو اَنت، ناشرکارانی ھلاپ ءَ جنگ برجاہ مان اِیت۔ سئے شمبے ءِ روچ ءَ صدر گس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ میجر عدنان اسلم ءِ شہیدی ءِ سر ءَ سک باز دلپدردی ءُ اپسوز ءِ درشانی کتگ۔ میجر عدنان اسلم لہتیں روچ پیسر ہندوستان ءِ کمک ءَ بوتگیں فتنہ الخریج ءِ ھلاپ ءَ جنگ ءِ وھد ءَ سک ٹپی بوتگ۔ صدر ءِ مملکت ءَ گوشت کہ میجر عدنان اسلم ءَ تمردی ءُ بہادری ءِ گوما وتی راجی فرض پیلو کت، راج ءَ را مدام وتی شھیدیں زھگ آناں یات بیت، شھید آنی قربانی بے سوب نہ رو اَنت، ناشرکاری ءِ ھلاپ ءَ جنگ برجاہ مان اِیت۔ آئی ءَ گوشت کہ راج وتی شھید آنی قربانی ءِ برکت ءَ ایمنیں آیوکیں باندات ءِ نیمگ ءَ رھادگ اِنت، ناشرکاری ءِ بزدلیں کار مئے حوصلہ ءَ ھم سست نہ کن اَنت، شھید آنی قربانی پاکستان ءِ جزم ءَ را گیش مھکم کن اَنت۔ صدر ءِ مملکت ءَ شہید ءِ گس ءِ گوما ہمدردی ءُ یکوئی ءِ درشانی کت۔ صدر ءِ مملکت ءَ دعا کت کہ اللہ تعالیٰ شہید ءِ سدگاں برز بہ کنت ءُ پُشپتگیں کھول ءَ صبر بہ دنت۔