مزن وزیر محمد شہباز شریف ءَ قازقستان ءِ نائب مزن وزیر ءُ درئی کارانی وزیر مورات نورتیلو ءَ گوں گند ءُ نند ءَ گوشت کہ پاکستان ءُ قزاقستان یکجائی مفاد ءِ بازیں پڑ آنی تہ ءَ دو نیمگی کمک ءَ را گیش مھکم کنگ ءِ واھشت مند اَنت

اسلام آباد۔9ستمبر  (اے پی پی):مزن وزیر محمد شہباز شریف ءَ گوشت کہ پاکستان ءُ قازقستان ءِ نیام ءَ مھکمیں براتی سیادی است انت ءُ یکجائی نپ ءِ بازیں پڑ آنی تہ ءَ دو نیمگی کمک ءَ را گیش مھکم کنگ ءِ واھشت مند انت۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی قازقستان ءِ نائب مزن وزیر ءُ دری کارانی وزیر مراد نورتولو ءَ گوں گپ ءُ تران کنان ءَ کت آئی ءَ مزن وزیر گس ءَ آئی ءَ گوں گند ءُ نند کت۔ گند ءُ نند ءِ تہ ءَ نائب مزن وزیر ءُ درئی کارانی وزیر اسحاق دار، مواصلات ءِ وفاقی وزیر عبدالعلیم خان، اقتصادی امور ءِ وفاقی وزیر احد خان چیما، ریلوے ءِ وفاقی وزیر حنیف عباسی، مزن وزیر ءِ ھاسیں کمکار طارق فاطمی ءُ درئی کارانی سیکرٹری ھم ھوار اتنت۔ مزن وزیر ءَ پاکستان ءِ اولی تر ءُ تاب ءَ کزاکستان ءِ نائب مزن وزیر ءَ را وش اتک کت ءُ کزاکستان ءِ صدر کسیم جومارت توکایف ءَ را نیکیں واھگ آنی درشان کت۔ آئی ءَ گوشت کہ پاکستان ءُ قازقستان ءِ نیام ءَ مھکمیں براتی سیادی است انت ءُ دوئیں ملک آنی تہ ءَ یکجائی دلچسپی ءِ بازیں شوبگ آنی تہ ءَ دو نیمگی کمک ءَ را گیش مھکم کنگ ءِ یکوئی واھشت ءِ است انت۔ مزن وزیر ءَ پاکستان ءِ واھشت ءِ درشان کت کہ قازقستان ءِ گوما دو نیمگی تجارت، سرمایہ کاری، رابطہ (ہوائی، ریل ءُ سڑک ءِ وسیلگ ءَ) ءُ مردم آنی نیام ءَ رابطہ آناں گیش بہ کنت۔ مزن وزیر ءَ گوشت کہ قازقستان ءِ صدر ءِ پاکستان ءِ تر ءُ تاب ءِ مزنیں ارزشت ءِ بیت۔ مزن وزیر ءَ آستانہ ءَ یک ڈل ءِ روان دیگ ءِ پیشکش کت کہ ایشی ءِ تہ ءَ جتا جتائیں مفاہمت نامہ ءُ ھیال ءُ لیکہ ءِ تہ ءَ ھواریں معاہدہ آناں گڈی رنگ دیگ بیت۔ گوستگیں بازیں ماہ ءَ چہ دوئیں نیمگ ءَ اے درگت ءَ باقاعدہ گپ ءُ تران بوھگ ءَ انت ءُ گمان انت کہ اے سال ءِ گڈ ءَ قازقستان ءِ صدر ءِ تر ءُ تاب ءِ ساھت ءَ دوئیں ملک آنی نیام ءَ ھاسیں مفاہمت ءُ معاہدہ آنی سر ءَ دستخط کنگ بیت۔ قازقستان ءِ نائب مزن وزیر ءَ گرمیں مہمان داری ءِ سر ءَ مزن وزیر ءِ شگر ءُ منت گپت ءُ نائب مزن وزیر ءُ دری کارانی وزیر سینیٹر محمد اسحاق ڈار ءِ گوما سرجمیں گپ ءُ تران ءِ بابت ءَ سرپد کت۔ آئی ءَ درشان کت کہ صدر توکایف ءِ اسلام آباد ءِ آیوکیں تر ءُ تاب سک باز راجدپتری ءُ کامیاب بیت ءُ پاکستان ءُ قازقستان ءِ سیادی آنی تہ ءَ نوکیں دور ءِ بندات بیت۔