مزن وزیر محمد شہباز شریف ءَ دوحہ ءَ اسرائیلی فوج ءِ نیمگ ءَ ناجائزیں اُرش، بمبتراک، نندگ جاہانی نشانگ جوڑ کنگ ءُ بے گناہیں شہری آنی جان ءَ را ھترہ ءِ آماچ کنگ ءِ سک باز مذمت کتگ

اسلام آباد۔9ستمبر  (اے پی پی):مزن وزیر محمد شہباز شریف ءَ دوحہ ءَ اسرائیل ءِ اُرد ءِ نیمگ ءَ چہ ناجائزیں اُرش، بمبتراک، آبادکاری دمگاں نشانگ جوڑ کنگ ءُ بے گناہیں شہری آنی جان ءَ را ھترہ ءِ آماچ کنگ ءِ سک باز مذمت کتگ ءُ قطر ءِ حکومت ءُ الس ءَ گوں یکوئی ءِ درشان کتگ۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ گوشت کہ آ دوحہ ءَ اسرائیلی اُرد آنی نیمگ ءَ ناجائزیں اُرش ءُ ھرابیں بمبتراک، رہائشی دمگ آناں نشانگ جوڑ کنگ ءُ شہری آناں را ھترہ ءِ آماچ کنگ ءِ سر ءَ سک باز مذمت کناں۔ آئی ءَ گوشت کہ اے گرانیں وھد ءَ مئے سرجمیں ھمدردی قطر ءِ امیر شیخ تمیم بن حمد الثانی، قطر ءِ شاہی خاندان ءُ قطر ءِ الس ءَ گوں انت ءُ ما ایشانی گوما یکوئی ءِ درشان کن ایں ۔ مزن وزیر ءَ اسرائیل ءِ نیمگ ءَ اے زوراکی ءِ کارروائی ءَ را سرجم ءَ بے جاہ لیک اتگ ءُ گوشت کہ اے اُرش قطر ءِ حاکمیت ءُ سرزمین ءِ یکوئی ءِ ھلاپ ورزی ءُ سکیں ھترناکیں اشتعال انگیز انت کہ ایشی ءَ چہ دمگی امن ءُ ایمنی ءَ را تاوان رسیت۔ آئی ءَ گوشت کہ پاکستان اسرائیل ءِ زوراکی ءِ ھلاپ ءَ ریاست قطر ءُ فلسطینی الس ءِ گوما مھکم اوشتاتگ۔