پی ٹی آئی نا گڑاس سینیٹ نا باسک الیکشن اٹی کنے وونٹ تننگ خوائسرہ، رانا ثنا ءا للہ

لاہور۔ 09 ستمبر (اے پی پی)مسلم لیگ (ن) پنجاب نا صدررانا ثناء اللہ پارینے کہ تحریک انصاف نا سینیٹ گچین کاری تیٹی بائیکاٹ اصل اٹ ’’راہِ فرار ‘‘ ءِ ، انتئے کہ اوفتے تینا ہی باسک آتیا پت اف۔ اوپارے کہ پی ٹی آئی بائیکاٹ نا پڑو کرے ولے پندار کاغد آتے جمع کرفے، پراسیس پورو کرے و ولدا عدالت آہنار، دابائیکاٹ آخا بلکن بے سہبی ءِ ڈکھنگ نا چم ءِ۔ پنجاب اسمبلی ٹی میڈیا تون گپ وتران کرسا رانا ثناء اللہ پارے کہ پی ٹی آئی نا گڑاس باسک کنے وونٹ تننگ خوائسرہ ولے ای اوفتے پاریٹ کہ تینا جماعت ءِ وونٹ ایتبو ۔ اودوبہ خلک کہ بانی پی ٹی آئی سیاست اٹی کرینگ و دوبہ خلنگ ناکلچر ءِ مون آ درے، وخت اس کہ او ملک اٹی بے چیٹی و انارکی خوارہ۔ اوپارے کہ دہشت گردی نا پد اٹ ہرا واکدار آک ءُ و دیراس اوفتے آسراتی ایتک، دا سوج ءِ غٹ ءِ سجفوئی مریک۔ اوناپاننگ ئس کہ سیاست گپ وتران اٹ مون آ کاہک، ڈیڈلاک اٹ آخا۔ رانا ثناء اللہ وزیراعظم محمد شہباز شریف نا ’’میثاقِ استحکام پاکستان‘‘ ءِ ملک انا سیاسی و عسکری سرکڑدہ غاتا اسیجائی سرسہبی گوندا و پارے کہ ’’معرکہ ءِ حق‘‘ اٹی دوئی مروک آ سرسہبیک پاکستان نا تاریخ اٹی غیرمعمولی ءُ۔ اوپارے کہ ہائیکورٹ سینیٹ الیکشن ءِ توتہو بلکن باندات سبجیکٹ ٹو کورٹ گوندانے۔ بانی پی ٹی آئی ءِ زندان اٹی غٹ آسراتی و فول پروف سیکورٹی بایدے ملے۔ علیمہ خان غا خوائے خسنگ نا واقعہ نا مذمت ءِ کرسا اوپارے کہ داوڑنا واقعہ مہالوہم مرسا کرینے۔