اسپیکر قومی اسمبلی تون بحرین شوریٰ کونسل نا باسک ڈاکٹر عادل عبدالرحمان المعودہ نا اوڑدہی

اسلام آباد۔ 09 ستمبر (اے پی پی) اسپیکر قومی اسمبلی سردار ایاز صادق تون بحرین شوریٰ کونسل نا باسک و کانود سازی و کانودی امور کمیٹی نا نائب سروک ڈاکٹر عادل عبدالرحمان المعودہ سے شنبے نادے آپارلیمنٹ ہاؤس اٹی اوڑدہی کرے ہراٹی پاک۔ بحرین ہڑتوم آ کنڈآتا تعلقداری تون اوار تین پہ تینی است خواہی نا ایلو امر تیا گپ وتران کننگا۔ داوخت آ اسپیکر مہمان تتون گپ وتران کرسا پارے کہ پاکستان و بحرین نا نیام اٹ برادرانہ تعلقداری ءِ، پاکستان دا تعلقداری تے بھاز اہمیت ایتک۔ اسپیکر سردار ایاز صادق ہڑتوم آملک آتا پارلیمان تا نیام اٹ رابطہ غاتے مون آ دننگ نا گرج آ زور شاغا و پارے کہ پارلیمانی کہول آ رابطہ غاتا مون آ دننگ آن ہڑتوم آملک آتا الس ءِ پین خڑک اتنگ امریک، پاکستان اٹی چندی بشخ آتیٹی زرکاری نا گیشتر وارخواہی ساڑی ءِ، بحرین نا زرکارپاکستان اٹی زرکاری آن فائدہ ہرفنگ کیرہ۔ اوپارے کہ قومی اسمبلی ٹی جوڑ پاک۔بحرین پارلیمانی فرینڈ شپ گروپ پارلیمانی کہول آ رابطہ غاتے مون آ دننگ اٹ اہم کڑد ادا کننگ ءِ۔ اسپیکر قومی اسمبلی بحرین اٹی رہینگوک پاکستانی تے گچین آسراتی تا فراوانی آ بحرینی حکومت نا منت واری ءِ ہرفے۔ بحرین شوریٰ کونسل نا باسک و کانودسازی و کانودی امور کمیٹی نا نائب سروک ڈاکٹر عادل عبدالرحمان المعودہ اسپیکر قومی اسمبلی نا بحرین نا بابت تاثرآتا ستاءِ کرے و پارے کہ بحرین پاکستان تون تینا متکن آ دوستانہ تعلقداری تے قدر انانظر اٹ ہرک۔ بحرین اٹی رہینگوک پاکستانیک بحرین نا شونداری و شونہالی ٹی اہم کڑد ادا کننگ ءُ، بحرین پاکستان تون تعلقداری تے پین سوگو کننگ نا خواہندار ءِ۔