پائیدار شونداری کن جدت ءِ تینا کننگ المی ءِ، بنجائی وزیر احسن اقبال نا جہانی سمٹ آن تران

اسلام آباد۔ 09 ستمبر (اے پی پی) بنجائی وزیر ڈٹ بندی ، شونداری و خصوصی گام گیج پروفیسر احسن اقبال پارینے کہ پائیدار شونداری کن جدت ءِ تینا کننگ المی ءِ، بدلی ٹی علم و پٹ وپول انا اہم ءُ کڑد اسے، پاکستان نا آخبت روشنا ءِ، پاکستان ٹیکنالوجی نا بشخ اٹی عالمگیر قائد جوڑ مننگ نا اہل ءِ، نن بدبختی اٹ سیاست ءِ سوشل میڈیا نا گوازی اس جوڑ کرینن۔ اوداہیت ءِ سے شنبے نادے آداڑے ’’ڈیجیٹل مینو فیکچرنگ ‘‘ نا سرحال آ 30 می جہانی سمٹ نا بنائی سیشن آن بطور مہمان خاص تران کرساپارے۔ اوپارے کہ پائیدار شونداری و ٹیکنالوجی ٹی جدت کن اختراع المی ءِ، ننا چین تختی آن فائیو جی اسکان نا سفر ءِ خنانے ہرا شش دہائی تیاتالان ءِ، بروک آ دور اٹی دہائی تا دا سفر شش سال آن ہم کم مد اٹی پورو مریک، آخبت آ نظر تخوک آ ہر ملک ءِ دابدلی و جدت نا احاطہ ءِ کروئی مریک، ننے بدلی نا شست مننگ نا جاگہ غا بدلی آن فائدہ ہرفنگ آ چکارکروئی مریک۔ بنجائی وزیرپارے کہ ہراتم نن 1998 ٹی وژن 2010ءِ جوڑکرین تو اوٹی نن ہمو غٹ امور آتا احاطہ ءِ کرین ہرافتا اینو ننے مون تروک ءِ ولے بدبختی اٹ اِراسال آن پد ملک اٹی اسہ بدلی اس بس ہرادا مچ آ کوشست آتے ردی نو ٹوکڑی ٹی خسا۔ 2013ٹی ہراتم ننے دُوارہ حکومت ملا تو نن مچ آملک آن اسہ ہزار اذہان مچ کرین و وژن 2025ءِ جوڑ کرین ہرانا ہدف دائس کہ 2025 اسکان نن ملک ءِ دنیا نا 20 بھلا زرگزران تیٹی اوار کننگ ءِ، 2017 ٹی پاکستان نا گلوبل برانڈ سی پیک ئس ولدا ملک اٹی اسہ کبین ءُ آزموندہ کننگا و اسہ جوہری واک والا ملک انا کنجی اسہ ہندن ءُ ڈیور اسے نا دُوٹی تننگا ہرادے اسہ یونین کونسل اسے نا چلیفنگ نا آزموندہ ہم الوکہ ہراتم گاڈی ءِ اناڑی ءُ ڈیور اسے نا دُوٹی تننگک تو او بیرہ ایکسیڈنٹ ہی کیک ۔ دانا دانتیجہ پیش تما کہ شونداری و نما نا ہرارفتاجوڑ مسوسس او سلیس۔