پاکستان ترکیہ ٹیکسٹائل ٹیکنالوجی سینٹر فیصل آباد اٹی جوڑ، انفارمیشن ٹیکنالوجی و ڈیجیٹل اکانومی ٹی تین پہ تینی کمکاری ءِ ودفنگک، بنجائی وزیر جام کمال خان

اسلام آباد۔ 09 ستمبر (اے پی پی) بنجائی وزیر واپار جام کمال خان پارینے کہ پاکستان۔ ترکیہ ٹیکسٹائل ٹیکنالوجی سینٹر فیصل آباد اٹی جوڑ کننگک، ورناتیکن ووکیشنل ٹریننگ پروگرام تا بناءِ کننگ انگ ءِ، انفارمیشن ٹیکنالوجی و ڈیجیٹل اکانومی ٹی ہڑتوم آملک آتا نیام اٹ کمکاری ءِ ودفنگک ۔ داخیال آتا درشانی ءِ او سے شنبے نادے آ داڑے 16 می پاک۔ ترکیہ اسیجائی وزارتی کمیشن نا دیوان آن تران اٹی کرے۔ دیوان ناکماشی ءِ بنجائی وزیر واپار جام کمال خان و ترک وزیر دفاع یاشار گولر کریر۔ دیوان اٹی پاکستان و ترکیہ نا نیام اٹ زرگزرانی کمکاری ءِ ودفنگ و ہڑتوم آملک آتا نیام اٹ زرگزرانی کمکاری ءِ ودفنگ وہڑتوم آ ملک آتا نیام اٹ واپاری تعلقداری ءِ پوسکن جہت تننگ نا عزم انا درشانی ءِ کننگا۔ جام کمال خان پارے کہ پاکستان و ترکیہ قدرتی شریدار ءُ، اسپیشل انویسٹمنٹ فیسلی ٹیشن کونسل ترک زرکارآتا پبی کمکاری ءِ کیک۔ اوپارے کہ پاکستان ترک زرکارآتے خصوصی اقتصادی زون تیٹی آسراتی تا سلاہ خلکنے، شمسی ، تہو و پن بجلی نا بشخ آتیٹی اسیجائی ڈٹ آتیا امنا کننگانے۔ جام کمال خان پارے کہ ہڑتوم آملک آتانیام اٹ تیل وگیس انا پٹنگ و ایل این جی واپار ءِ ہم ودفنگک۔ بنجائی وزیر پارے کہ پاکستان و ترکیہ نجی بشخ ءِ زرکاری کن آمادہ کیر۔ اوہڑتوم آملک آتا نیام اٹ اسیجائی بینک ایبل ڈٹ آتا سلاہ ہم تس۔ جام کمال کان پارے کہ ترکیہ نا دفاعی ٹیکنالوجی ٹی شونداری ستاکڑزک، اودفاعی پیدوار و ٹیکنالوجی ٹرانسفر آ اسیجائی گام گیج آتا پڑو ءِ ہم کرے۔ وزیرواپار پارے کہ دیوان اٹی کشت وکشار نا بشخ اٹی اسیجائی ڈٹ آتیا امنا کننگا، سیڈ ٹیکنالوجی، فوڈ پراسیسنگ و مویشی بانی ٹی کمکاری ءِ ودفنگک، داکان بیدس لائیو اسٹاک و ماہی پروری ٹی زرکاری آہم گپ وتران کننگا۔