کشاری بشخ اٹی پوسکن آ مالیاتی ماڈل آتے تینا کننگ نا سخت گرج ءِ، بنجائی وزیر خزانہ نا اکیومن پاکستان نا ڈل اتون اوڑدہی ٹی گپ وتران

اسلام آباد۔ 09 ستمبر(اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ کشاری بشخ اٹی موسمیاتی موزونیت ، غذائی رکھ و خلقی علاقہ غاتیٹی روزگار نا وارخواہی تے ودفنگ کن پوسکن آ مالیاتی ماڈل آتے تینا کننگ نا سخت گرج ءِ۔ او داہیت ءِ سے شنبے نادے آ داڑے اکیومن پاکستان نا سی ای او و کنٹری ہیڈڈاکٹر عائشہ خان نا کماشی ٹی ڈل اتون اوڑدہی ٹی پارے۔ اوڑدہی ٹی اکیومن نا ٹیم وزیرخزانہ ءِ پاکستان کن 90 ملین ڈالر نا ایگریکلچر ریزیلینس فنڈ آ پیش رفت آن معلومدار کرے ہرا کشاری بشخ اٹی موسمیاتی بدلی تتون موافقت کن فنانس آسراتی نا وڑاٹ ڈیزین کننگانے۔ وزیرخزانہ داگام انا ستاءِ کرسا پارے کہ پاکستان موسمیاتی بدلی تیان زیات زہمی مروک آ ملک آتیٹی اوار ءِ۔ پاکستان ءِ تینا کشاری زرگزران اٹ سنگین چیلنج مون تروک ءِ۔ اوپارے کہ کشاری بشخ اٹی موسمیاتی موزونیت ، غذائی رکھ و خلقی علاقہ غاتیٹی روزگار نا وارخواہی تے ودفنگ کن پوسکن آ مالیاتی ماڈل آتے تینا کننگ نا سخت گرج ءِ۔ اوپاکستان تون کمکاری وپائیدار مخ تفی نا بابت اکیومن نا عزم انا خیرمقدم ءِ کرے و خور انا نظام ءِ سوگو کننگ، اسمارٹ فارمنگ ءِ مون آ دننگ و کشاری کاروبار اٹی زرکاری نا کمک اٹ بزغر آتا لچک ءِ ودفنگ نا بابت اکیومن پاکستان نا کوشست آتاستاءِ کرے۔ وزیرخزانہ باوری کرفے کہ حکومت پاکستان نا پائیدار شونداری و چاگڑدی لچک نا ایجنڈا تون مطابقت نا بابت زرکاری گام گیج آتا پورو مخ تفی ءِ کیک۔ دیوان اٹی پاننگاکہ ملک انا گچین مننگ تون زرگزرانی ٹک و آخبت نا مثبت سمت انا رداٹ اکیومن نا بورڈ ممبران و جہانی زرکارآتیا تالان اسہ بڑزکوکہول اسے نا ڈل بروک آ تُو پاکستان نا دورہ ءِ کیک، ڈل اسلام آباد، لاہور وکراچی ٹی اہم شریدار آتون اوڑدہی کیک، دیوان اٹی فریق آک پاکستان اٹ سوگو و پائیدار کشاری بشخ انا شونداری کن کمکاری ءِ پین مون آ دننگ نا عزم انا درشانی ءِ کریر۔