وزارت واپار نا گام گیج آتا سوب ملک اٹی واپار نا مون آ دننگ، زرکار و کاروباری بندغ آتا حکومت آ پت انا درشانی

اسلام آباد۔ 09 ستمبر(اے پی پی) وزیراعظم محمد شہباز شریف نا واپاری وژن نا رداٹ ملک اٹی واپاری سرجزآتا مون آ دننگ کن وزارت واپار نا کنڈآن چندی اہم گام گیج کننگانے ہرافتا سوب ملک اٹی واپار نا مون آ دننگ، زرکار و کاروباری بندغ آک حکومت آ پت انا درشانی ءِ کرینو۔ ساڑی آ حکومت مچ آملک اٹی واپار نا مون آ دننگ و برآمد آتیٹی ودکی کن وزارت واپار نا پبی کمکاری ءِ برجاتخانے۔ وزارت واپار و بنجائی وزیر واپار جام کمال خان نا کوشست آتا سوب ہندی و جہانی کاروباری بندغ و ادارہ غاتا پت اٹی ودکی مسنے۔ بنجائی وزیر واپار جام کمال خان نا کنڈآن غٹ بشخ آتا کاروباری بندغ آتا ویل آتے ایسر کننگ نا چرجوئی برجاءِ داکان بیدس ہندی پوریاگر آتا پیشن ناملک واپاری نمائندگی ءِ ہم ودفنگ انگ ءِ ہراڑآن زرگزرانی سرجزآتون اوار اوار ملکی زرگزران آہم مثبت اثر تمنگ ءِ۔ ہرانا ساڑی آ درور پیشن ناملک آتیٹی پاکستانی برنج آتا پذیرائی کن روڈ شو انا اڈتننگ ہم اوار ءِ۔ وزارت واپار نا گچین واپاری حکمت عملی نا سوب برجاسال جنوری ٹی ٹریڈ ڈویلپمنٹ اتھارٹی آف پاکستان نا کنڈآن گھانا ٹی سرسہب’’پاکستان رائس روڈ شو‘‘ اڈتننگا ہراٹی کاروباری بندغ آتا بھلو کچ اس بشخ ہلکر، داکان بیدس آبدجان اٹی ہم اِرادے ئی ایونٹ اسے نا بست وبند کننگا ہراٹی 28 نمان برنج برآمد کروک آ کمپنیک بشخ ہلکر۔ ہنداوڑنا اسہ پین نمائش اس  برجاسال انا ایسر آ سینیگال اٹی ہم اڈتننگک ہراڑآن پاکستانی برنج آتا برآمد آتیٹی ودکی اتون اوار اوار پوسکن آ واپاری شریدار آتیٹی ہم ودکی مریک۔ ساڑی حکومت نا مثبت واپاری پالیسی تا سوب 2023-24 اٹی 4 ارب ڈالر مالیت نا برنج مچ آ دنیا نا 100 آن زیات ملک آتے برآمد کننگا۔ داڑتون اوار اوار وزارت واپار 5 سال انا جوان ٹیکسٹائل و لویس پالیسی آ کاریم ءِ ترندی اٹ برجاتخانے ہرانا مسخت پاکستان نا صنعت ءِ علاقائی وڑاٹ مسابقتی جوڑ کننگ تون اوار اوار واپاری اڑاند آتے مر کننگ اوار ءِ۔ پالیسی ٹی توانائی ٹیرف پروٹیکشن، مالی کمکاری، پوسکن آ اکنامک زون تا جوڑ کننگ، پبلک و پرائیویٹ شریداری ٹی ودکی و زرکارآتیکن ون ونڈو آپریشن اوار ءِ۔ وزارت واپار کاروباری بندغ آتا رکھ اکن انشورنس آرڈیننس 2000اٹی سلاہ ئی ترمیم آتیا ہم کاریم ءِ برجاتخانے ہرانا مسخت کاروباری بندغ و ادارہ غاتے واپاری رکھ فراوان کننگ ءِ۔ وزیر واپار جام کمال نا کنڈآن ساڑی آ دورہ ءِ بنگلہ دیش ہم ہندی پوریاگر برادری کن واپار نا پوسکن ءُ کسر آوار کرینے۔ تینا ساڑی آ دورہ ٹی وزیرواپار جام کمال خان واپاری امور آ اسیجائی ورکنگ گروپ اسے نا جوڑ کننگ کن مفاہمتی یات داشت آہم دستخط کرینے ہراڑآن ہڑتوم آملک آتا نیام اٹ واپار ءِ مون آ دننگ دوئی مریک۔ داکان بیدس وزیر واپار تینا دورہ ٹی بنگلہ دیش انویسٹمنٹ ڈویلپمنٹ اتھارٹی، نیشنل بورڈ آف ریونیو، ٹریڈنگ کارپوریشن آف بنگلہ دیش ، ٹریڈ اینڈ ٹیرف کمیشن نا بڑزکو کمامدارآتون ہم اوڑدہی کرے ہرانا مسخت کاروباری سرجزآتا مون آ دننگ تون اوار اوار ہڑتوم آ ملک آتا نیام اٹ واپاری کچ اٹی ودکی کننگ ہم اوار ءِ۔ جام کمال بنگلہ دیشی کمامدارآتون 2005 آن پد آن غیر فعال مروک آ اسیجائی اکنامک کمیشن ءِ دُوارہ فعال کننگ نا فیصلہ ہم کرے داکان بیدس اسیجائی ٹریڈ کمیشن نا جوڑ کننگ و حلال فوڈ انا بشخ آتیٹی کمکاری ءِ ودفنگ آہم امنا کننگا۔