پولیو مہم اٹی اسہ کروڑ 97 لکھ چناتے پولیو دین آن بچفنگ نا پڑی کُنفنگا، این ای او سی

اسلام آباد۔ 09 ستمبر(اے پی پی) مچ آملک اٹی یکم ستمبر آن 7 ستمبر اسکان برجاسلوک آ پولیو تور مہم اٹی 5 سال آن کم وئی نا اسہ کروڑ 97 لکھ آن زیات چناتے پولیو دین آن بچفنگ نا پڑی کُنفنگا۔ نیشنل ایمرجنسی آپریشن سینٹر (این ای او سی) نا کنڈآن جاری بیان نا رداٹ پاکستان اٹی پولیو دین نا چٹفنگ نا برجاکوشست آتا رداٹ خصوصی پولیو تور مہم اٹی 81 ہائی رسک ضلع غاتیٹی پنچ سال آن کم وئی 1 کروڑ97 لکھ آن زیات چناتے پولیو آن بچفنگ نا پڑی کُنفنگاہرا پاکستان نا پولیو نا چٹفنگ نا عزم ءِ تالان کیک۔ پولیو تور مہم اٹی پنجاب اٹی 40 لکھ 4 ہزار آن زیات چناتے ویکسین تننگا وخت اس کہ سندھ اٹی کم و ود 87 لکھ 27 ہزار چناتے پولیو آن بچفنگ نا پڑی کُنفنگا۔ بلوچستان اٹی 22 لکھ 27 ہزار آن زیات چناتے ویکسین کُنفنگا و خیبرپختونخوا ٹی کم و ود 40 لکھ 25 ہزار چناتے ویکسین تننگا۔ داکان بیدس مہم اٹی اسلام آباد اٹی 4 لکھ 79 ہزار، گلگت بلتستان اٹی 1 لکھ 12 ہزار و آزاد کشمیر اٹی 1 لکھ 64 ہزار چناتے ویکسین کُنفنگا۔ نیشنل ایمرجنسی آپریشن سینٹر پولیو لمہ و باوہ، سرپرست ، سول انتظامیہ ، کانود نافذ کروک آ ادارہ و فرنٹ لائن پولیو ورکرآتا پبی کمکاری نا است انا ہب اٹ منت واری ءِ ہرفک۔ پولیو ورکرز و سیکورٹی کارندہ غاک قوم انا ہیروک ءُ ہرافتا سخت خواری و لگن پاکستان ءِ پولیو آن پاک کننگ نا سفر اٹی پیش رفت ءِ پدریسہ برجاتخانو۔ ایڑے ، پنجاب نا نہہ ضلع ہرافتے ٹی لاہور، شیخوپورہ ، قصور، اوکاڑہ، گوجرانوالہ، سیالکوٹ، ملتان، مظفرگڑھ و بہاولپور اوار ءُ، ٹی نوکاپ نا سوب آن خصوصی پولیو تور مہم ءِ پدبِٹنگانے، ہراٹی رسینگ و آپریشن زہمی مسنو۔ دا ضلع غاتیٹی پولیو مہم نا پوسکن آ تاریخ تا پڑو ءِ زوت کننگک تانکہ ہر چناءِ وخت آ ویکسین فراوان کننگ مرے۔ سویلی خیبرپختونخوا، باجوڑو اپردیراٹی مہم 15 ستمبر آن بناکیک ہراٹی پین 16 لکھ 80 ہزار چناتے پولیو آن بچفنگ نا پڑی کُنفنگک۔ اولمہ و باوہ غاتیان خواست کرینے کہ ہرمہم اٹی پنچ سال آن کم وئی غٹ چناتے پولیو ویکسین المی کنفرتانکہ ناجوڑی تیان رکھ ءِ پک کننگ مرے۔ مہم اٹی اگہ چناس پولیو نا پڑی کُننگ آن محروم سلے تو دمدستی وڑاٹ جان جوڑی رکھ ہیلپ لائن 1166 آ کال کیر یا پولیو واٹس ایپ ہیلپ لائن 03467776546آ کلہو اس مون ایتر۔ پولیو ٹیم آتون پبی کمک کیر و تینا چناتا رکھ ءِ پک کیر۔