زالبول و مسن تے تعلیم نا کمک اٹ واکدار کننگ آ خصوصی چکار کننگ نا گرج ءِ، صدر مملکت آصف علی زرداری نا جہانی یوم ءِ خواندگی نا وخت آ کلہو

اسلام آباد۔ 08 ستمبر (اے پی پی) صدر ءِ مملکت آصف علی زرداری زالبول و مسن تے تعلیم نا کمک اٹ واکدار کننگ آخصوصی چکار کننگ نا گرج آ زور شاغسا پارینے کہ اسہ قوم اس ہم ہمووخت اسکان تینا اصل لائخی تے دوئی کننگ کپک ہراتم اسکان اونا نیمہ آبادی شونداری نا عمل اٹی شریک مف، حکومت ءِ پاکستان خواندگی نا مون آ دننگ کن پکا عزم تخک و سوگو السی پالیسی، آب اٹ تعلیم اٹی زرکاری، ڈیجیٹلائزیشن اٹی جدت و کمیونٹی نا اواری نا کمک اٹ دا مسخت نا کنڈآ ہِننگ ءِ۔ دوشنبے نادے آ ایوان ءِ صدر نا پریس ونگ انا رداٹ صدر ءِ مملکت داخیال آتا درشانی ءِ جہانی یوم ءِ خواندگی نا وخت آ تینا کلہواٹی کرے۔ اوپارے کہ اینو جہانی یوم ءِ خواندگی آ ای غٹ پاکستانی تیان خواست کیوہ کہ او دا عظیم مسخت تون تینا وابستگی نا درشانی ءِ کیر و اسہ ہندن ءُ پاکستان اس ٹہیفر ہراڑے خواندگی لس مرے، تعلیم جوان مرے و علم ہر اسٹ نا دوٹی مرے۔ صدر ءِ مملکت پارے کہ ای پاکستان نا الس و مچ آ دنیا نا ہمو غٹ بندغ آتے مبارکبادی ایتیوہ  ہرا اسہ ہندن ءُ جہانی راج اسےنا ٹہیفنگ کن کوشست کننگ ءُ ہراڑے علم و ہیل کننگ نا وارخواہی غٹ اکن دُوئی مرے۔ اوپارے کہ خواندگی بیرہ خواننگ و لکھنگ نا لائخی نا پن اف بلکن دا انسانی فکری نشوونما نا مون آ دننگ، عزت ءِ نفس انا باندات و اسہ بنداوی انسانی حق ہم ارے، دابندغ آتے پت ایتک ، اوفتے راج اٹی توار فراوان کیک و دا وارخواہی تا درگہ غاتے ملک ہرا ایلم دروشم اٹ اوفتا وس آن پیشن مریرہ۔ صدر ءِ مملکت آصف علی زرداری پارے کہ خواندگی ذاتی شونداری و راجی ارتقاء نا بنداو ہم ارے ہرا شاری تے زرگزران، دودوربیدہ و جمہوریت اٹی پبی بشخ ہلنگ نا قابل کیک۔ اوپارے کہ خواندگی پاکستان کن قومی تعمیر نا بنداو ءِ ، دانیزگاری ٹی کمتی، جدت نا مون آدننگ، جمہوریت نا سوگوی و پائیدار شونداری کن اہم حیثیت تخک۔ صدر ءِ مملکت پارے کہ اسہ تعلیم یافتہ قوم اس ہی سوگو قوم اس مریک ہرا پامدار، استقامت و تخلیقی لائخی تتون تینا ویل آتا مقابلہ ءِ کننگ کیک۔ اوپارے کہ نن زالبول و مسن تے تعلیم نا کمک اٹ واکدار کننگ آ خاص چکار کین۔ اسہ تعلیم یافتہ زالبول اس نئے بیرہ تینے جوڑ کیک بلکن تینا خاہوت و راج انا آسودہی نا ذریعہ ہم جوڑ مریک، او بدلی و شونداری نا علمبردار مریک۔ زالبول آتا تعلیم اٹی زرکاری، جان جوڑخاہوت، سوگو زرگزران و اسہ منصفانہ راج اسے نا ضمانت ءِ۔ صدر ءِ مملکت پارے کہ اسہ قوم اس ہم ہمووخت اسکان تینا اصل لائخی دوئی کننگ کپک ہراتم اسکان اونا نیمہ آبادی شونداری نا عمل اٹی شریک مف، حکومت ءِ پاکستان خواندگی نا مون آ دننگ کن پکاعزم تخک و سوگو السی پالیسی، آب اٹ تعلیم اٹی زرکاری، ڈیجیٹلائزیشن اٹی جدت و کمیونٹی نا شمولیت نا کمک اٹ دامسخت نا کنڈآ ہِننگ ءِ۔ اوپارے کہ پاکستان رسمی و غیررسمی تعلیم ءِ سوگو کرسا دا پک کننگ ءِ کہ ہرچنا، ورنا و بالغ بندغ، او چائے ہراکہ وئی، جنس و راجی و اقتصادی پس منظر تون تعلق تخے، ہیل کننگ نا وارخواہی دوئی کننگ کے۔ صدر پارے کہ دا قومی فرض اجتماعی عزم انا خواہندار ءِ، خاہوت، کمیونٹی ، سول سوسائٹی، میڈیا و نجی بشخ اتون اوار ننے غٹ ءِ تینا کڑد ءِ ادا کروئی مریک۔ ننے ہیل کننگ نا دودوربیدگ ءِ مون آ دروئی مریک و تعلیم ءِ مچ آ قوم انا اسیجائی میرات جوڑ کروئی مریک۔ اوپارے کہ اینو جہانی یوم خواندگی آ ای غٹ پاکستانی تیان خواست کیوہ کہ او داعظیم مسخت تون تینا وابستگی نا درشانی ءِ کیر و اسہ ہندن ءُ پاکستان اس ٹہیفر ہراڑے خواندگی لس مرے، تعلیم جوان مرے و علم ہراسٹ نا دوٹی مرے۔ صدر ءِ مملکت آصف علی زرداری داہیت آ زور شاغا کہ نن اواری اٹ اسہ ہندن ءُ راج اس جوڑ کین ہرا انسانی وقار نا پاسداری ءِ کے، زالبول آتے واکدار کے و ننا شاری تا پورو لائخی تے امن، شونہالی و شونداری کن کاریم اٹ اتے۔ اودعاکرے کہ اللہ تعالیٰ ننے دا مشن اٹی سرسہبی عطاکے و پاکستان ءِ اسہ روشنا، تعلیم یافتہ و شونہال ملک اس کے۔