حکومت خواندگی نا کچ اٹی ودکی کن ہرممکن گام گیج کیک، وزیراعظم شہباز شریف

اسلام آباد ۔ 08 ستمبر (اے پی پی) وزیراعظم محمد شہباز شریف پارینے کہ حکومت خواندگی نا کچ اٹی ودکی کن ہرممکن گام گیج کیک، بنجائی و صوبائی حکومت آک اواری اٹ قومی مہم اس چلیفرہ۔ 8 ستمبر آخواندگی نا جہانی دے آ تینا کلہو اٹی وزیراعظم پارے کہ خواندگی نا جہانی دے آ پاکستان دنیا تون ہم توار مرسا علم و خوان نا قوم تا تعلیمی، زرگزرانی و راجی زند اٹی اہمیت و شونداری و شونہالی ٹی بنداوی حیثیت ءِ تالان کننگ تینا فرض تکک۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم پارے کہ تعلیم بیرہ لکھنگ و خواننگ نا لائخی یا حروف تہجی آن واقفیت نا پن اف بلکن دا انفرادی و اجتماعی کہول آ قوم اسے نا بنداو ءِ سوگو کرسا تابناک آخبت نا کنڈآ سفرکننگ نا پن ءِ۔ تعلیم و تربیت ، خواندگی و علم و تدریس نا دا سفر ہر قوم انا چین تے جوڑ کننگ نا اسہ پدریسہ جہد اسے، ہنداسوب آن دا ملک اسے نا جم و بامعنی شونداری کن حکومت نا اولیت مرے ۔ اوپارے کہ پاکستان اٹی خواندگی نا کچ 60 درسد ءِ ہراکہ نئے بیرہ دنیا نا پوسکن آخواست آتیان کم ءِ بلکن سویلی ایشیانا ایلو ملک آتیان ہم کم ءِ۔ دا فکر انگیز حالیت ننے داہیت انا یات دہانی کرفک کہ ننے بحیثیت قوم تعلیم نا دوئی کننگ ءِ تینا اولیت آتیٹی اوار کرسا ہرممکن گام گیج کننگ نا گرج ءِ تانکہ نن تینا چنا، ورنا و راج انا اجتماعی شونداری نا کسر تے ملنگ کین۔ وزیراعظم پارے کہ تعلیم نا دوئی کننگ نا اہمیت دین اسلام نا بنداوی تعلیمات آتیٹی اوار ءِ و بانی پاکستان محمد علی جناح ہم اونا اہمیت ءِ تالان کرے۔ بنجائی و صوبائی حکومت آک علم و تدریس نا مون آ دننگ و خواندگی نا کچ اٹی ودکی کن یکجاءُ۔ داقومی مہم نا بنداوی مسخت دادے کہ ہر چنا نئے بیرہ بنداوی تعلیم دوئی کے بلکن بڑزکو تعلیم، کسبکاری و ٹیکنیکل علم آن اونا واقفیت ہم پک مرے۔ تینا بروک آ چین تے پوسکن آ دور انا خواست آتون ہم گرنچ کننگ نا دا اسٹ انگا کسر ءِ۔ ولے دا قومی مسخت حکومت و الس نا مخ تفی آن بیدس دوئی کننگ مفک۔ داڑکن استاد، لمہ وباوہ و راجی کہول آ ہرشاری ءِ تینا فرض و اہم کڑد ءِ ادا کروئی مریک۔ وزیراعظم پارے کہ ننے غٹ ءِ اواری اٹ داعزم انا درشانی ءِ کروئی مریک کہ نن بحیثیت قوم ناخواندگی نا تہاری ءِ علم انا روشنائی اٹ منور کین و اسہ سوگو، باصلاحیت و شون ہلوک پاکستان اسے نا بنداو ءِ تخن۔