بنجائی وزیر مذہبی امور تون بنگلہ دیشی صدر نا سلاہکار نا اوڑدہی، جوائنٹ ورکنگ گروپ نا ٹہیفنگ آ امنا

اسلام آباد۔ 05 ستمبر (اے پی پی) بنجائی وزیر مذہبی امور  سردار محمد یوسف تون بنگلہ دیشی صدر نا سلاہکار مذہبی امور اے ایف ایم خالد حسین جمعہ نا دے آ ڈل اتون اوار اوڑدہی کرے۔ وزارت مذہبی امور نا رداٹ بنگلہ دیشی ڈل پاکستان اٹ نوکاپ آن جونی و مالی نسخان تیا است ہسونی نا درشانی ءِ کرے۔ ڈل اتون گپ وتران کرسا وزیر مذہبی امور پارے کہ پاکستانی الس ءِ بنگلہ دیشی الس تون ایلم جوزہ ءِ۔ ہڑتوم آ ملک آتا تعلقداری اسیجائی روایت، اسلامی میرات، راجی قدر انا بنداوتیا استوار ءُ ۔ پاکستان و بنگلہ دیش نا نیام اٹ تعلقداری ٹی گچینی ڈیہہ اکن اہم پک مریک۔ بنگلہ دیشی صدر نا سلاہکار پارے کہ پبی بیابخیری آ پاکستانی الس و حکومت نا منت واراُن۔ ہڑتوم آ ملک آتا وزارت مذہبی امور نا نیام اٹ کمکاری ءِ مون آ دننگ کن گام گیج کیرہ۔ بنجائی وزیر سردار محمد یوسف ہڑتوم آملک آتا عالم دین و مدرسہ غاتا طالب علم آتان ہن و برنا سلاہ تس۔ اوڑدہی ٹی پاکستان و بنگلہ دیش نا نیام اٹ بین المذاہب  ہم گرنچی نا مون آدننگ کن جوائنٹ ورکنگ گروپ اس ٹہیفنگ آ امنا کننگا۔ بنگلہ دیشی ڈل پاکستان اٹی مروک آ اِرادے ئی جہانی سیرت کانفرنس اٹی بشخ ہلیک۔