وزیراعظم شہباز شریف نا چینی ہم منصب لی چیانگ تون اوڑدہی، سی پیک نا بروک آ ریسہ ٹی 5 پوسکن کوریڈورز آ اواری اٹ کاریم ءِ برجاتخنگ آامنا، مفاہمت نا یات داشت ومعاہدہ غاتیا دستخط

بیجنگ۔ 04ستمبر (اے پی پی) وزیراعظم محمد شہباز شریف و السی جمہوریہ چین نا وزیراعظم لی چیانگ پاکستان و چین نا نیام اٹ سوگو وہمہ جہت تزویراتی کمکاری آ تالان شریداری ءِ پین سوگو کننگ نا  عزم انا درشانی ءِ کرسا سی پیک نابروک آ ریسہ ٹی 5 پوسکن کوریڈورز آتیا اواری اٹ کاریم ءِ برجاتخنگ آ امنا کرینو وخت اس کہ ہڑتوم آملک آتا نیام اٹ سی پیک نا ارٹ میکو ریسہ، سائنس وٹیکنالوجی، انفارمیشن ٹیکنالوجی، میڈیا و کشت وکشار تون اوار چندی بشخ آتیٹی کمکاری نا مون آ دننگ کن مفاہمت نا یات داشت و معاہدہ غاتیا دستخط کننگا۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف داڑے السی جمہوریہ چین نا وزیراعظم لی چیانگ تون اوڑدہی کرے۔ اوڑدہی ٹی ہڑتوم آ راہشونک پاک چین تعلقداری ٹی مثبت پیش رفت آ است جمی نا درشانی ءِ کریر۔ وزیراعظم شہباز شریف پاکستان نا علاقائی سالمیت، وتواجہی وراجی و اقتصادی شونداری کن بدل مفروک مخ تفی آ چینی سرکڑدہ و قوم انا است انا ہب اٹ منت واری ءِ ہرفے۔ صدر شی جن پنگ و وزیراعظم محمد شہباز شریف نا نیام اٹ 2 ستمبر آمروک آ اوڑدہی ٹی طے مروک آ اہم امنائی سلاہ نا بنداو آ چینی وزیراعظم لی چیانگ و وزیراعظم شہباز شریف پاکستان وچین نا نیام اٹ سوگو و ہمہ جہت تزویراتی کمکاری آ تالان شریداری ءِ پین سوگو کننگ کن تینا اسیجائی عزم انا درشانی ءِ کریر و اسیجائی ایکشن پلان(2024-2029)آ دستخط ءِ دا چرجوئی ٹی اہم گام اس گوندنگا۔ وزیراعظم محمد شہباز شریف پارے کہ پاکستان نا حکومت نا اصلاحات نا کوشست آتا اومیت افزاء نتیجہ بیرہ چین نا پبی مخ تفی نا سوب آن ممکن مسنے۔ اوزوت ہی چینی کیپٹل مارکیٹ اٹی پانڈابانڈز انا فراوانی نا پاکستان نا ارادہ نا ہم درشانی ءِ کرے۔ اقتصادی بشخ انا بابت وزیراعظم تدوک آ دہائی ٹی پاکستان نا راجی و اقتصادی شونداری ٹی صدر شی جن پنگ نا بیلٹ اینڈ روڈ انیشی ایٹیو (بی آرآئی) نا اسہ اہم ڈٹ، چین۔ پاکستان اقتصادی راہداری نا اہم شریداری ءِ تالان کرے و قراقرم ہائی وے و ریلوائی ٹی لائن۔1 ءِ دُوارہ ترتیب تننگ و گوادر پورٹ انا زوت فعال مننگ نا گرج آ زور شاغا۔ ہڑتوم آ فریق آک چین۔ پاکستان اقتصادی راہداری نا اپ گریڈڈ/فیز2، بشمول 5 پوسکن کوریڈور آتیکن اواری اٹ کاریم کننگ آ امنا کریر۔ وزیراعظم محمد شہباز شریف بزنس ٹو بزنس کمکاری و زرکاری نا گیشتر گمان تیا زور شاغسا چینی وزیراعظم ءِ بیجنگ اٹی مروک آ زرکاری کانفرنس نا بارواٹی پارے ہراٹی 300 آن زیات پاکستانی و 500 چینی کمپنی شریک مننگ ءُ۔ اوکشت وکشار ، کانڑکنی ومعدنیات، ٹیکسٹائل ، صنعتی بشخ و آئی ٹی ءِ تین پہ تینی وڑاٹ فائدہ مند اقتصادی کمکاری کن اولیتی بشخ گوندا۔ وزیراعظم شہباز شریف چینی صدر شی جن پنگ نا جہانی گورننس انیشی ایٹیو ، گلوبل ڈویلپمنٹ انیشی ایٹیو، گلوبل سیکورٹی انیشی ایٹیو و گلوبل سولائزیشن انیشی ایٹیو تون اوار کثیر الجہتی نظام ءِ سوگو کننگ کن اوناتاریخی گام گیج آتیکن پاکستان نا مخ تفی نا درشانی ءِ کرے۔ ڈل آتا کہول آ گپ وتران آن پد چینی وزیراعظم نا کنڈآن وزیراعظم نا اعزاز اٹی اسہ پروقار ءُ ظہرانہ اس تننگا ۔ یات سلے کہ ہڑتوم آملک آک بروک آسال پاک چین سفارتی تعلقداری نا قیام نا 75 می سال دے ءِ اڈایترہ۔ ہڑتوم آملک آتا نیام اٹ چین۔ پاکستان اقتصادی راہداری (سی پیک) نا فیز 2 انا شونداری، سائنس وٹیکنالوجی، انفارمیشن ٹیکنالوجی، میڈیا و کشت وکشار تون اوار چندی بشخ آتیٹی کمکاری ءِ ودفنگ نا بابت مفاہمتی یات داشت و معاہدہ غاتیا دستخط نا دود ہم اڈ ہلک ہراٹی ہڑتوم آ وزیراعظم آک بشخ ہلکر۔