قاضی القضاۃ فلسطین ڈاکٹر محمود صدقی عبدالرحمان الہباش نا کماشی ٹی چار باسکی ڈل انا بنجائی وزیر سردار محمد یوسف تون اوڑدہی

اسلام آباد۔ 04 ستمبر (اے پی پی) قاضی القضاۃ فلسطین ڈاکٹر محمود صدقی عبدالرحمان الہباش نا کماشی ٹی چار باسکی ڈل پنچ شنبے نادے آ بنجائی وزیر مذہبی امور سردار محمد یوسف تون اوڑدہی کرے۔ ترجمان مذہبی امور نا رداٹ فلسطینی ڈل پاکستان اٹی نوکاپ آن زہمی علاقہ غاتیٹی جونی  ومالی نسخان تیا است ہسونی نا درشانی ءِ کرے۔ داوخت آ سردار محمد یوسف ڈل اتون گپ وتران کرسا پارے کہ ملت فلسطین نا مخ تفی  دین، چین ، عقیدہ و دودوربیدہ غان ماورا اسہ انسانی و اخلاقی فرض اسے ، غزہ ٹی برجاپدریسہ کشت وخون، انسانیت و مقدس آتا خلاف ورزی تا مذمت ءِ کینہ، پاکستان ہرحال اٹ فلسطین نا سیاسی، اخلاقی و سفارتی مخ تفی ءِ برجاتخک۔ بنجائی وزیرپارے کہ وزیراعظم شہباز شریف نا پارت آ غزہ نامظلوم تیکن کمکی گڑا گدریفنگ انگ ءِ۔ فلسطینی ڈل انا سروک پارے کہ غزہ ٹی ظلم آ جوان توار بڑز کننگ آ پاکستان نا منت وار اُن، ستمبر نا تُو اٹی کیہی ملک آک فلسطین ءِ آجو ووتواجہ ریاست اس امنا کیرہ، ہمووخت خڑک ءِ ہراتم عالم اسلام نا لیڈر مسجد اقصیٰ ٹی یکجا مرسا شکرانہ نا نفل خوانرہ۔ اوڑدہی ٹی عالم دین تا ہن وبر و گپ وتران نا مون آ دننگ کن اواری اٹ کاریم کننگ آ امنا کننگا۔ اوڑدہی ٹی امام مسجد اقصیٰ و امام مسجد ابراہیمی ئسک ہم اوار ئسر۔