دریاب ستلج اٹی ہائی فلڈ الرٹ جاری، بھارتی ڈیم تیان دِیر انا پیش تمنگ آن حالیت سنگین مس، این ڈی ایم اے

اسلام آباد۔ 04 ستمبر (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دریاب ستلج اٹی غیرمعمولی وڑاٹ بڑزکو نوکاپی حالیت آتا رداٹ ہائی فلڈ الرٹ جاری کرینے۔ نیشنل ایمرجنسیزآپریشن سینٹر نا رداٹ، گنڈاسنگھ والا ٹی دریاب ستلج نا وہینگ 335،591کیوسک ریکارڈ کننگا، ہراکہ بے کچ بڑزکو کچ ءِ۔ این ڈی ایم اے نا رداٹ، دا ودکی بھارتی ڈیم، پونگ و بھاکر اغان دِیر انا پدریسہ پیش تمنگ نا سوب ءِ ۔ پونگ ڈیم 98 درسد وخت اس کہ بھاکراڈیم 96 درسد پُر ءُ، ہراڑآن دریاب ستلج اٹی نوکاپی حالیت پین سنگین مننگ کیک۔ سلیمانکی ٹی ہائی فلڈ نا حالیت گمانی ءِ، ہراڑے دِیر انا پیش تمنگ کم و ود 132،000 کیوسک اسکان سرمننگ کیک۔ ہنداوڑ، اسلام آباد نا ہند آ نیامی آن ہائی فلڈ نا خطرہ ءِ، ہراڑے پیش تمنگ 95،700 کیوسک نا خڑک ءِ۔ بروک آ دے تیٹی ہڑتوم آ ہند آتیا ہائی فلڈ نا حالیت برقرار سلنگ نا خدشہ ءِ۔ داحالیت آتیٹی قصور، اوکاڑ، پاکپتن ، بورے والا، عارف والا و بہاولنگر ضلع غاتے ہائی فلڈ اتون مون تروئی مننگ کیک۔ کشاری ڈغار، خلقی آبادی و نزور انفراسٹرکچر ءِ نوکاپی دِیر تیان بھاز خطرہ مون تروک ءِ ۔ ترجمان نا رداٹ این ڈی ایم اے صوبائی و ضلعی انتظامیہ تون پدریسہ رابطہ ٹی ءِ تانکہ مخلوق نا رکھ کشنگ و ریلیف سرجزآتے پک کننگ مرے ۔ الس آن خواست کننگانے کہ او ہندی انتظامیہ نا پارت آتیا سختی اٹ عمل کیر و ہلہلہ ئی حالیت آتیٹی ریسکیو 1122 یا تعلقدار کمامدارآتون رابطہ کیر۔