چین ءِ صنعت ءُ انفارمیشن ٹیکنالوجی ءِ وزیر لی لیچنگ ءَ مزن وزیر شہباز شریف ءَ گوں گند ءُ نند کتگ، مزن وزیر ءَ سی پیک دومی بھر ءِ تہ پیشرفت ءِ سر ءَ دل یکیمی ءِ درشانی

بیجنگ۔4ستمبر  (اے پی پی):مزن وزیر محمد شہباز شریف ءَ چین ءُ پاکستان اقتصادی راہداری ءَ را پاکستان ءِ چاگردی ءُ اقتصادی دیمروئی ءِ مرکزی ستون لیک اتگ ءُ سی پیک ءِ دومی بھر ءِ تہ ءَ برجاھیں پیشرفت ءِ سر ءَ دل یکیمی ءِ درشان کتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ پنچ شمبے ءِ روچ ءَ چین ءِ صنعت ءُ انفارمیشن ٹیکنالوجی ءِ وزیر لی لیچنگ ءَ گوں گند ءُ نند کتگ۔ مزن وزیر ءَ صنعت، کشت ءُ کشاری، تجارت، انفارمیشن اینڈ کمیونیکیشن ٹیکنالوجی، کان کنیءُ معدنیات ءِ پڑ ءَ چین ءِ گوما دو نیمگی کمک ءَ را گیش گہتر کنگ ءِ پاکستان ءِ وژن ءِ سر ءَ زور پر دات۔ آئی ءَ چین ءُ پاکستان ءِ اقتصادی راہداری ءَ را پاکستان ءِ چاگردی ءُ اقتصادی دیمروئی ءِ مرکزی ستون لیک اِتگ ءُ سی پیک دومی بھر ءِ برجاھیں دیمروئی ءِ سر ءَ دل یکیمی ءِ درشان کتگ۔ مزن وزیر ءِ اقتصادی اصلاحات ءِ ایجنڈا ءِ توسیپ کنان ءَ چینی وزیر لی لیچنگ ءَ اے گپ ءِ سر ءَ زور پر دات کہ چین پاکستان ءَ را وتی نزیکیں دوست ءُ ہر نیمگ ءَ اسٹریٹجک شریک لیک ایت۔ آئی ءَ پاکستان ءِ گوما دو نیمگی سیادی ءَ را کمک ءُ شریکداریءِ نوکیں بالاد ءَ سر کنگ ءِ چین ءِ مھکمیں جزم ءِ درشان کت۔