بیجنگ۔ 03 ستمبر (اے پی پی) وزیراعظم محمد شہباز شریف بیجنگ اٹی آنژن ہسپتال نا دورہ ءِ کرے و ہسپتال اٹی گچین نظام، پوسکن آ ٹیکنالوجی و گچین خذمت آتا فراوانی نا ستاءِ کرے۔ چارشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ داوخت آ نائب وزیراعظم و وزیرخارجہ محمد اسحاق ڈار، وزیرداخلہ محسن نقوی ، بنجائی وزیر ڈٹ بندی و شونداری احسن اقبال ، وزیرخزانہ محمد اورنگزیب، بنجائی وزیر حوالکاری و شینکاری عطاء اللہ تارڑ و بڑزکو آفیسر آک وزیراعظم تون اوار ئسر۔ ہسپتال نا دورہ ٹی وزیراعظم ءِ ہسپتال اٹی دوئی آسراتی تا بارواٹی حوال تننگا۔ وزیراعظم ہسپتال اٹی دوئی آسراتی تا معائنہ ءِ کرے و ہسپتال اٹی گچین نظام، پوسکن آ ٹیکنالوجی و گچین خذمت آتا فراوانی آ ہسپتال انتظامیہ نا ستاءِ کرے۔ وزیراعظم وزیرداخلہ محسن نقوی ءِ اسلام آباد اٹی زیر تعمیر ڈٹ و وزارت جان جوڑی ءِ اسلام آباد اٹی زیر تعمیر جناح میڈیکل کمپلیکس و ایلو ہسپتال آتیٹی آنژن ہسپتال نا وڑآ سادہ، سوگو وپائیدار انفراسٹرکچر جوڑ کننگ نا پارت کرساپارے کہ پاکستان اٹی زیرتعمیر ہسپتال آتیٹی چین ناوڑآ آب اٹ آسراتی فراوانی ءِ اولیت تننگے۔ دورہ ٹی وزیراعظم ءِ ہسپتال اٹی دوئی جان جوڑی نا آسراتی و ہسپتال نا گچین بست وبند کن ساڑی روبوٹس و ایلو پوسکن آ ٹیکنالوجی تا آسراتی تا معائنہ ءِ کرفنگا۔
