نوکا پ آن زہمی علاقہ غاتیٹی پبی کمکی سرجزآک برجاءُ، ڈی جی آئی ایس پی آر نا وزیر حوالکاری و شینکاری و چیئرمین این ڈی ایم اے تون اوار میڈیابریفنگ

اسلام آباد۔ 19 اگست (اے پی پی) ڈی جی آئی ایس پی آر لیفٹیننٹ جنرل احمد شریف چوہدری پارینے کہ نوکاپ زہمی علاقہ غاتیٹی آرمی چیف نا پارت آ پاک فوج و پاک فضائیہ کمکی سرجزآتیٹی پبی بشخ ہلنگ ءُ، نوکاپ آن زہمی علاقہ غاتیٹی داتم اسکان 6903بندغ آتے ریسکیو کننگا، 6 ہزار آن زیات بندغ آتے امداد فراوان کننگا وخت اس کہ چیئرمین این ڈی ایم اے لیفٹیننٹ جنرل انعام حیدر پارے کہ غٹ ادارہ غاتا مربوط و اسیجائی کوشست آتیان 17 اگست آن داتم اسکان 25 ہزار مخلوق ءِ بچفنگانے، 23 اگست اسکان پِر تا ہفت می اسپیل ترند مریک۔ داخیال آتا درشانی ءِ او بنجائی وزیر حوالکاری و شینکاری عطاء اللہ تارڑ و چیئرمین این ڈی ایم اے لیفٹیننٹ جنرل انعام حیدر تون اوار بشام ناپِر و نوکاپ نا حالیت آتا بابت این ڈی ایم اے ٹی میڈیا ءِ حوال ترساکرے۔ ڈی جی آئی ایس پی آر لیفٹیننٹ جنرل احمد شریف چوہدری پارے کہ آرمی چیف فیلڈ مارشل سید عاصم منیر نا پارت آ پاک فوج نوکاپ زدہ علاقہ غاتیٹی کمکی سرجزآتیٹی لگوک ءِ، خیبرپختونخوا ٹی انفنٹری و ایف سی نا ہشت یونٹ کمکی کارروائی تیٹی لگوک ءُ، اسہ یونٹ گلگت بلتستان اٹی کمکی کارروائی تیٹی اختہ ءِ۔ اوپارے کہ روڈ انفراسٹرکچر نا حالیت بے کچ خراب ءِ، کسر تا بحالی کن انجینءرز بٹالینز کاریم کننگ ءِ، خیبرپختونخواٹی 90 سڑک آتے بھاز بے وڑ نسخان رسینگا، 9 جاگہ غاتیا سڑک آتے بحال کننگانے، ایلو سڑک آتے عارضی وڑاٹ بحال کننگ انگ ءِ، قراقرم ہائی وے 8 جاگہ غاتیان بلاک ئس، غٹ جاگہ غاتے کلیئر کننگانے، جگلوٹ سکردو روڈ ءِ ہم کلیئرکننگانے، استک برج آ کاریم برجاءِ، زوت آن زوت اودے ہم ملنگک۔ اوپارے کہ مسہ میڈیکل بٹالین تیان بیدس سی ایم ایچ آن ڈاکٹر آتا ٹیم ءِ خیبرپختونخواغا روانہ کننگانے، 9 میڈیکل کیمپ آتا کمک اٹ زہمی تے طبی امداد فراوان کننگ انگءِ، 6903بندغ آتے ریسکیو کننگا، داتم اسکان 6 ہزار آن زیات بندغ آتے امداد فراوان کننگا۔ اوپارے کہ آرمی چیف ناپارت آ پاک فوج انا اسہ دے انا راشن ءِ نوکاپ آن زہمی تیکن مختص کننگانے ہراکہ 585 ٹن ءُ۔ ڈی جی آئی ایس پی آر پارے کہ آرمی ایوی ایشن ہم کمکی سرجزآتیٹی بشخ ہلنگ ءِ، بونیر اٹی اِرا بٹالین، شانگلہ ٹی 2 بٹالین، سوات اٹی اسہ بٹالین، دیر اٹی اسہ ایف سی ونگ ، باجوڑ اٹی اسہ ایف سی ونگ و سوات ٹی اسہ کمپنی اس کمکی سرجزآتیٹی اختہ ءُ، پیر بابا نا علاقہ ٹی بیس قائم کننگانے ہراڑے آرمی و سول ریسورسز اواری اٹ کاریم کننگ ءُ، ایئرفورس انا سی 130 جہاز آتا کمک اٹ کمکی گڑافراوان کننگ انگ ءِ۔ اوپارے کہ آرمی نا سگنلز یونٹ پی ٹی اے تون اواری اٹ زہمی علاقہ غاتیٹی ٹیلی کام نا آسراتی نا فراوانی کن کاریم کننگ ءِ، 16 بی ٹی ایس ٹاور نا جوڑجاڑ کننگانے۔ چیئرمین این ڈی ایم اے پارے کہ قطبی علاقہ غاتیٹی گلیشیئر نا دِیر مننگ نا سوب آن نوکاپی حالیت ودی مس، این ڈی ایم اے نا ویب سائٹ آ پِر و نوکاپی حالیت آتا بابت غٹ سرجم آک ساڑی ءُ، چندی علاقہ غاتیٹی کلاؤڈ برسٹ نا سوب آن نوکاپی حالیت ودی مس، پِر و نوکاپ آن 670 بندغ زوال و اسہ ہزار بندغ ٹھپی مسر، بے گوا بندغ آتیان گیشتر نا لاش آک ملانو،غٹ بے گوا بندغ آتا پٹنگ اسکان کمکی سرجزآک برجاسلرہ۔ اوپارے کہ آرمی چیف تعلقدار ادارہ غاتون اواری اٹ کمکی سرجزآتا پارت کرے۔ نوکاپ آن زہمی تا بچفنگ و پٹنگ نا دنگ ءِودفنگ انگ ءِ ، غٹ ادارہ غاتا مربوط و اسیجائی کوشست آتیان 17 اگست آن داتم اسکان 25 ہزار مخلوق ءِ بچفنگانے ، ٹھپی تے ہسپتال آ سرکننگا، گچین طبی امداد تننگ انگ ءِ۔ چیئرمین این ڈی ایم اے پارے کہ 23 اگست اسکان پِر تا ہفت می اسپیل ترند مریک، پِر تا پوسکن آ اسپیل نا بابت تیاری پورو ءِ۔ اوپارے کہ قطبی پنجاب، گلگت بلتستان نا گڑاس علاقہ غاتیٹی دا اسپیل ممکن ءِ، چندی ذریعہ اٹ الس ءِ معلومداری فراوان کننگ انگ ءِ، این ڈی ایم اے نا موبائل ایپ پاک۔ این ڈی ایم اے ڈیزاسٹرالرٹ آہم وخت آمعلومداری و آگاہی فراوان کننگ انگ ءِ ، زہمی علاقہ غاتا شاری دا معلومداری آن آگاہی دوئی کننگ کیرہ۔ اوپارے کہ نیشنل ایمرجنسی سینٹر اٹی پی ڈی ایم ایز تون اوار غٹ ادارہ غاتون ہڑدے ئی بنداو آ کانفرنس کننگک۔ چیئرمین این ڈی ایم اے پارے کہ پی ایم راشن پیکج نا رداٹ نوکاپ آن غٹ آن زیات زہمی پنچ ضلع غاتیٹی امداد نا مسٹ میکو کھیپ ءِ گدریفنگ انگ ءِ، امداد اٹی دوائی و راشن گدریفنگ انگ ءِ، کیمپ و ہسپتال آتیٹی ساڑی زہمی تا کمک ءِ پک کننگ انگ ءِ، صوبائی ادارہ غاتون اواری اٹ کاریم کننگ اُن۔ اوپارے کہ قطبی علاقہ جات خاص کر خیبرپختونخوا و گلگت بلتستان اٹی نوکاپ یا لینڈ سلائیڈنگ آن بند مروک آ شاہراہ تا بھالی کن پاک فوج، این ایچ اے و ایلو تعلقدار ادارہ غاتا عملہ کاریم کننگ ءُ، داتم اسکان سڑک آتا بحالی نا 50درسد آن زیات کاریم پورو مسنے، 22 اگست اسکان دا علاقہ غاتسکان پورو رسینگ ءِ بحال کننگک۔ اوپارے کہ زہمی علاقہ غاتیٹی اُراتتون اوار انفراسٹرکچر نا نسخان نا کساس ءِ خلنگ انگ ءِ۔