نائب مزن وزیر ءُ درئی کارانی وزیر  سینیٹر  محمد اسحاق ڈار ءَ انسانی کمک ءِ جھان ءِ روچ ءِ درگت ءَ گوشت کہ سیاسی سوبمندی ءِ واستہ بے لگامیں زوراکی ءُ جنون انسانی ڈکال آنی مستریں سبب اَنت

اسلام آباد۔19اگست  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ ما انسانی کمک ءِ جھان ءِ روچ ءِ موہ ءَ انسانی کمک ءِ کارندہ آنی بہادری، استقامت ءُ شفقت ءَ را شرپ پیش کن ایں کہ آ وتی جان ءَ را خطرہ ءَ چہ ندر کنگ ءَ انت کہ آ جہانی انسانی کمک ءِ تہ ءَ گیش بوھوکیں انسانی ڈکال آنی تہ ءَ پریشانیں مردم آناں رکھینگ ءَ انت۔ مرچی میان استمانی براتی ءَ را جنگ ءُ جیڑہاں ھوار انسانی ڈکالانی بُنکی سبباں چہ گیش ءُ گیوار کنگ ءِ وتی عزم ءِ سر ءَ پدا زور دیگی اِنت۔ نائب مزن وزیر ءُ درئی کارانی وزیر ایس محمد اسحاق ڈار ءَ درئی کارانی کارگس ءِ جارکش ءِ نیمگ ءَ چہ انسانی کمک ءِ جھان ءِ روچ ءِ موہ ءَ جاڑی بوتگیں کلوہ ءِ تہ ءَ گوشت کہ بے لگامیں زوراکی ءُ وت مہ وتی ءِ واستہ جنونی بہانہ انسانی ڈکال آنی مستریں سبب اَنت۔ اقوام متحدہ ءِ منشور ءِ رد ءَ تنازعات امن ءِ وسیلگ، میانجی داری، گپ ءُ تران ءُ سفارتکاری ءِ وسیلگ ءَ گیش ءُ گیوار کنگ بہ بنت۔ نائب مزن وزیر ءُ دری کارانی وزیر اسحاق ڈار ءَ گوشت کہ غزہ ءَ برجاھیں قبضہ ءُ محاصرہ انسانی کمک، المی وردن ءُ دوا ءُ درمان آنی آسراتی آنی سر ءَ بندش ءِ سبب ءَ شہری آناں تکلیف دیگ ءَ انت۔ فلسطین ءِ تہا برجاھیں نسل کشی ءِ اثر سک باز انت کہ اودا ھاندان، زھگ ءُ عام شہری ناقابل تصوریں رنج ءُ گم ءِ آماچ انت۔ میاں اوستمانی براتی ءَ را غزہ ءِ انسانی جاور ھال ءَ را میاں اوستمانی کانود ءِ رد ءَ زوتیں رنگ ءَ گیش ءُ گیوار کنگی اِنت۔ آئی ءَ گوشت کہ اقوام متحدہ ءَ را ناجائزیں رنگ ءَ مقبوضہ جموں ءُ کشمیر ءَ برجاھیں انسانی ڈکال ءِ سر ءَ ھم ھاسیں دلگوشی دیگ لوٹ ایت، اودا دہائی آنی سرکوبی، زوراکی ءَ چہ درکنگ، وتی مرضی ءِ رد ءَ بندیگ کنگ، آبادی ءِ بدلی ءُ کشمیری آنی جائزیں حق ءِ سرکوب کنگ ءِ منظم کوشست آنی تہ ءَ کشمیری آنی جائزیں ھک ءِ سر ءَ چہ وت ءَ را گیش ءُ گیوار کنگ ءَ انت۔ نائب مزن وزیر ءُ دری کارانی وزیر ءَ گوشت کہ بھارت ءِ نیمگ ءَ آپ ءُ ایندگر المی وسیلگ آناں سلاہ ءِ رنگ ءَ کارمرد کنگ نوکیں ءُ ھترناکیں ھترہ ءِ نشانی اِنت، ایشی ءَ چہ دمگ ءَ پیسر ءَ چہ ناقابل تصوریں انسانی سانحہ ءِ سبب جوڑ بوت کنت۔ وزیر ءِ درئی کار ءَ گوشت کہ سرجمیں دگنیا ءَ موسمی مٹ ءُ بدلی ءِ سبب ءَ پیداکیں انسانی ڈکال آناں گر ءُ دار ءِ واستہ یکجائی میاں اوستمانی پسو ءِ ضلورت اِنت۔ گوستگیں سالاں موسمیاتی بدلی ءَ ھم پاکستان ءَ را غیر متناسبیں رنگ ءَ تاوان داتگ۔ پاکستان ءَ برجاھیں سیلاب یک رندے پدا موسمی بدلی ءِ انسانی چیلنج آنی گیواری ءِ واستہ جھان ءِ تہ ءَ گامگیج ءِ زوتیں ضلورت ءِ سر ءَ پدر کنت۔ انسانی شراکت داری ءَ چہ آماچیں آبادی ءِ حمایت ءَ برجاہ دارگی اِنت۔ آئی ءَ گوشت کہ بیا اِت کہ ما زند ءُ انسانی شرپ ءِ رکھینگ ءُ امن ءِ دیمروئی ءِ واستہ وتی عزم ءَ را نوک بہ کن ایں، مئے دیم ءَ چیلنج بے درور اَنت بلے گوں جھان ءِ یکوئی، فیصلہ کنوکیں گامگیج ءُ انصاف ءُ انسانیت ءِ رھبندانی سر ءَ عمل کنگ ءَ میاں اوستمانی براتی رنج ءُ گماں کم کنگ ءُ امن ءُ ایمنی ءِ ھاترا عادلانہ آیوکیں وھد ءَ را بحال کنگ ءَ اِنت۔