پاکستان ءُ بنگلہ دیش ءَ توانائی ءُ معدنی وسیلگ آنی شوبگ ءَ کمک ءَ را گیش کنگ ءِ وعدہ کتگ

اسلام آباد۔19اگست  (اے پی پی): پاکستان ءُ بنگلہ دیش ءَ توان ءُ معدنی وسیلگ آنی شوبگ ءَ کمک ءَ را گیش کنگ ءِ جزم ءِ درشان کتگ۔ سئے شمبے ءِ روچ ءَ وزارت پٹرولیم ءِ نیمگ ءَ جاڑی بوتگیں بیان ءِ رد ءَ پٹرولیم ءِ وفاقی وزیر علی پرویز ملک ءَ بنگلہ دیش ءِ ہائی کمشنر ایم ڈی اقبال حسنہ ءَ گوں پٹرولیم ءُ نیچرل گیس ءَ گند ءُ نند کتگ ایشی ءِ ساھت ءَ چوناھا، کوئلہ ءُ پٹرولیم ءِ وڑیں کلیدی شوبگ آنی تہ ءَ یکجائی منصوبگ آنی سر ءَ گپ ءُ تران کتگ۔ اے موہ ءِ سر ءَ پٹرولیم ءِ وفاقی وزیر علی پرویز ملک ءَ گوشت کہ پاکستان بنگلہ دیش ءِ گوما وتی سیادی ءَ را سک باز ارزشت دنت ءُ جتاجتائیں شوبگ آنی تہ ءَ کمک ءَ را گیش کنگ ءِ واھشت مند اِنت۔ آئی ءَ گوشت کہ مزن وزیر محمد شہباز شریف بنگلہ دیشی برات آنی گوما کمک ءَ را دیم ءَ برگ ءِ واستہ جزمیگ انت تانکہ دوئیں ملک اقتصادی دیمروئی ءُ توان ءِ ایمنی ءَ چہ سیت چست بہ کن انت۔ دیوان ءِ تہ ءَ پٹ ءُ پول ، چوناھا ، کوئلہ ، ءُ پٹرولیم ءِ چیز آنی تہ ءَ تجارت ءِ پڑ ءَ شریکداری ءِ امکانات آنی سر ءَ تران کنگ بیت۔ دوئیں نیمگ ءَ اے شوبگ آنی توانائی ءَ را سرجمی ءَ کارمرد کنگ ءِ واستہ زانتکاری ءِ تبادلہ ءُ سرمایہ کاری ءِ موہ آنی ارزشت ءِ سر ءَ زور پر دات۔ بنگلہ دیش ءِ ہائی کمشنر ءَ اقتصادی ءُ توانائی ءِ شوبگ ءَ کمک ءَ را مھکم کنگ ءِ واستہ پاکستان ءِ واھشت ءَ را ساڑات۔ آئی ءَ گوشت کہ اے رنگیں کمک ءَ چہ دمگی برجائی ءُ وشھالی ءَ ھاسیں کرد ءِ پیلو کنت۔ آئی ءَ پاکستان ءِ گوما تجارتی ءُ سرمایہ کاری سیادی ءَ را گیش وسعت دیگ ءِ واستہ بنگلہ دیش ءِ واھشت ءِ ھم پدر کت۔ اے گند ءُ نند ءَ پاکستان ءُ بنگلہ دیش ءِ دو نیمگی سیادی ءَ را گیش گہتر کنگ ءُ توان ءُ معدنی وسیلگ آنی شوبگ ءَ وت مہ وتی دیمروئی ءِ نوکیں موہ آناں پٹ ءُ پول کنگ ءِ جزم ءِ درشان کنگ بیت۔