دری کارانی وزیر اسحاق ڈار ءَ برطانیہ ءِ پارلیمانی میاں اوستمانی ، اوگانستان ءُ پاکستان ءِ پارلیمانی انڈر سیکرٹری ءَ گوں گند ءُ نند

اسلام آباد۔18اگست  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ دو شمبے ءِ روچ ءَ لندن ءَ درئی کار، دولت مشترکہ ءُ دیمروئی کارگس ءَ برطانیہ ءِ میاں اوستمانی، اوگانستان ءُ پاکستان ءِ پارلیمانی انڈر سیکرٹری ہمیش فالکنر ءَ گوں گند ءُ نند کت۔ درئی کارانی کارگس ءِ جارکش ءِ رد ءَ گند ءُ نند ءِ ساھت ءَ دوئیں نیمگ ءَ دو نیمگی سیادی آنی سرجمیں دائرہ کار ءِ سر ءَ چار ءُ تپاسی کتگ ءُ چاگردی، سیاسی، اقتصادی ءُ مردم آنی نیام ءَ کمک ءَ را گیش وسعت دیگ ءِ واستہ وتی یکجائی عزم ءِ سر ءَ پدا زور داتگ۔ ایشانی تہ ءَ دمگی ءُ جھان ءِ دیمروئی آنی سر ءَ ھم گپ ءُ تران کنگ بوت۔ نائب مزن وزیر ءُ وزیر ءِ درئی کار ءَ اقتصادی اصلاحات ءِ واستہ پاکستان ءِ عزم ءِ سر ءَ زور پر دات ءُ دمگی جاور ھال آنی بابت ءَ پاکستان ءِ ھیال ءُ لیکہ آناں سر کت ایشی ءِ تہ ءَ جنوبی ایشیا ءَ امن ءُ ایمنی ھوار اِنت۔ آئی ءَ اقوام متحدہ ءِ سلامتی کونسل ءِ سیادی داروکیں قرارداد آنی رد ءَ جموں ءُ کشمیر جیڈھ ءِ انصاف ءُ پرامن گیواری ءِ ارزشت ءِ سر ءَ ھم زور پر دات۔ دوئیں بامرد آں پاکستان ءُ برطانیہ ءِ سیادی ءِ تہ ءَ جوانیں رجحان ءَ را ساڑات ءُ وت مہ وتی دلچسپی ءِ شوبگ آنی تہ ءَ برجاھیں کمک ءِ سر ءَ دل یکیمی ءِ درشان کت۔ ایشاں دو نیمگی سیادی آناں گیش وسعت دیگ ءُ اسٹریٹجک کمک ءِ واستہ نوکیں راہ آنی شوھازگ ءِ واستہ باقاعدہ مزنیں تک ءِ ھوار بوھگ ءِ برجائی ءِ سر ءَ ھم زور پر دات۔