وفاقی وزیر تجارت جام کمال خان ءَ سویڈن ءِ سفیر الیگزینڈرا برگ وان لنڈ ءَ گوں گند ءُ نند کتگ، تجارت، سرمایہ کاری ءُ چاگردی کمک ءِ بابت ءَ گپ ءُ تران

اسلام آباد۔18اگست  (اے پی پی): وفاقی وزیر تجارت جام کمال خان ءَ پاکستان ءَ سویڈن ءِ سفیر الیگزینڈرا برگ وان لنڈے ءَ گوں گند ءُ نند کت۔ دو شمبے ءِ روچ ءَ جاڑی بوتگیں پریس ریلیز ءِ رد ءَ گند ءُ نند ءَ وت مہ وتی تجارت، سرمایہ کاری ءِ موہ ءُ وت مہ وتی کمک ءِ جتاجتائیں پڑ آنی سر ءَ ھیال ریچی کنگ بوتگ۔ سفیر ءَ گوستگیں ھور ءُ جمبر ءِ سبب ءَ پاکستان ءَ جانی ءُ مال ءِ تاوان ءِ سر ءَ اپسوز ءِ درشانی کت۔ وزیر تجارت جام کمال خان ءَ گوشت کہ موسمی مٹ ءُ بدلی ءِ چیلنج آنی گر ءُ دار ءِ واستہ یکجائی کوشست ءِ ضلورت اِنت۔ گند ءُ نند ءِ ساھت ءَ دوئیں نیمگ ءَ اقتصادی کمک ءَ را گیش مھکم کنگ ءِ امکان آنی سر ءَ چار ءُ تپاسی کنگ بوت۔ وزیر تجارت ءَ ٹیکسٹائل، تیاریں پوشاک، آئی ٹی ءُ ٹیکنیکل ایجوکیشن، معدنیات، سرجیکل سامان ءُ اسپورٹس سامان ءِ شوبگ آنی تہ ءَ پاکستان ءِ توانائی آنی سر ءَ زور پر دات ءُ گوشت کہ سویڈن ءِ کمپنی اے شوبگ آنی تہ ءَ سرمایہ کاری ءَ چہ سرجمی ءَ سیت چست کت کن اَنت۔ سفیر ءَ ٹیکسٹائل برآمدات ءِ واستہ پاکستان ءِ جھان ءِ نام ءَ را من اِت ءُ گوشت کہ سویڈن ءِ خریدار پاکستانی پیداوار ءَ را دگنیا ءِ جوانیں چیز آنی تہ ءَ لیک اَنت۔ آئی ءَ گوشت کہ سویڈن ءِ بازیں کسان ءُ میاں اوستمانی کمپنی پاکستان ءِ گارمنٹس ءِ شوبگ ءَ سرمایہ کاری ءِ واھشت مند اَنت، اے درگت ءَ سویڈن ءِ کاروباری ڈل زوت کراچی ءِ تر ءُ تاب ءَ کنت ءُ دمگی صنعت کار آنی گوما گند ءُ نند ءُ برآمداتی موہ آناں چار ءُ تپاسی کنت۔ گند ءُ نند ءَ وزیر تجارت ءَ سفیر ءَ را سرپد کت کہ پاکستان ءِ راجدپتر ءَ اولی رند ءَ حکومت مزن وزیر ءِ ہدایت ءِ رد ءَ درآمد ءِ ٹیرف ءَ کم کم ءَ کم کنگ ءَ انت ، آیوکیں پنچ سال آنی تہ ءَ ایشی ءَ را 15 ءَ چہ 20درسد ءَ ایر کنگ بیت۔ آئی ءَ گوشت کہ اے پالیشی ءِ مول ءُ مراد برآمدات ءِ کمک ءُ کوالٹی ءِ چیز آناں درآمد کنگ اِنت کہ بنجاہی تک ءَ دست نہ کپ اَنت تانکہ ویلیو ایڈیشن ءَ پد آ دوبر برآمد کنگ بہ بنت۔ جام کمال ءَ گوشت کہ پاکستان ءَ ھم کمپلائنس ءِ پڑ ءَ مزنیں پیشرفت کتگ، ءُ نیشنل کمپلائنس سینٹر (این سی سی) جوڑ کنگ بوتگ تانکہ بنجاہی مینوفیکچررز راجی ءُ میاں اوستمانی معیار آناں سرجم بہ کن اَنت۔ وزیر ءَ سوج دات کہ این سی سی ءِ چیر دستی ءَ سیمینار برجم دارگ بہ بنت تانکہ پاکستان ءِ تعمیل ءِ کارروائی ءِ بابت ءَ درملکی کمپنی ءُ سفارتی مشن آناں سرپد کنگ بہ بیت۔ دوئیں نیمگاں آیوکیں وھد ءِ کمک ءِ ھاسیں پڑ ءِ رنگ ءَ معدنیات، قابل تجدید توانائی، سبزیں ٹیکنالوجی، پیشہ وارانہ تربیت ءُ مہارت ءِ دیمروئی ءِ شناخت کتگ۔ وزیر تجارت ءَ گوشت کہ یورپ ءَ ھیلتھ کیئر ءَ ھوار نرسنگ اسٹاف ءِ کمی ءَ را پاکستانی پیشہ ور آنی وسیلگ ءَ پیلو کنگ بوت کنت۔ آئی ءَ گوشت کہ سویڈن ءِ 40 ءَ چہ گیش کمپنی گلوبل برانڈز ایچ اینڈ ایم ءُ آئیکیا ءَ ھوار پاکستان ءَ چہ بھا زورگ ءَ انت ایشی ءَ چہ دوئیں ملک آنی نیام ءَ بیپاری سیادی ءِ مھکمی ءِ پدریچ بیت۔ آئی ءَ سویڈن ءَ را قابل تجدید توانائی، پائیدار مینوفیکچرنگ، آئی ٹی ءُ انفراسٹرکچر ءِ تہ ءَ سرمایہ کاری ءِ واستہ ءُ پاکستان ءَ آیوکیں تجارتی میل آنی تہ ءَ بھر زوری ءِ دعوت دات۔ وزیر تجارت ءَ یورپی یونین ءَ پاکستان ءِ جی ایس پی پلس ءِ درجہ ءِ واستہ سویڈن ءِ برجاھیں کمک ءِ توسیپ کت ءُ آیوکیں چار ءُ تپاسی ءِ عمل ءَ برجاھیں کمک ءِ لوٹ کت۔ آئی ءَ برآمد کنوک آنی دیم ءَ اتکگیں بینکنگ جیڈھ آناں گیواری ءِ واستہ پاکستان ءِ مرکزی بینک ءُ سویڈن ءِ مالیاتی ریگولیٹرز ءِ نیام ءَ گیشیں کمک ءِ ھم لوٹ کتگ۔ وزیر تجارت جام کمال خان ءَ گوشت کہ پاکستان ءُ سویڈن ءِ نیام ءَ سیاسی، اقتصادی ءُ مردمی سیادی ءَ را گیش گہتر کنگ ءِ بے دروریں گنجائش است انت، ایشی ءَ را کارمرد کنگ المی انت۔