چیئرمین پی سی بی محسن نقوی ءَگوں ہاکی ٹیمب ءِ کپتان عماد شکیل بٹ ءِ گند ءُ نند

لاہور۔18اگست  (اے پی پی): پاکستان ہاکی ٹیم ءِ کپتان عماد شکیلبٹ ءَ پاکستان کرکٹ بورڈ ءِ چیئرمین محسن نقوی ءَ گوں گند ءُ نند کتگ۔ اے موہ ءِ سر ءَ عماد شکیلبٹ ءَ محسن نقوی ءَ را نشان امتنز ءِ رسگ ءِ مبارک بات دات ءُ ھاکی ءِ گوازی ءِ بحالی، پرو ھاکی لیگ ءَ بھر زوری ءُ لیب کنوک آنی زاتی جیڈھ آنی بابت ءَ سرپد کت۔ گند ءُ نند ءِ تہ ہاکی لیب کنوک آنی وشھالی، بحالی ءُ لیب ءُ گوازی ءِ ھوالگ ءَ جیڈھ آنی سر ءَ سرجمیں رنگ ءَ ھیال ءُ لیکہ ءِ درشان کنگ بوت۔ محسن نقوی ءَ ہاکی ءِ کھڈکار آنی واستہ یک یک ملین کلدار ءِ انعام ءِ جار جتگ ءُ گوشت کہ کھڈکار آنی میڈیکل ءُ فٹنس کیس پی سی بی ءِ میڈیکل ٹیم ءِ نیمگ ءَ چہ دیم ءَ آرگ بنت، وھدیکہ ویزا ءِ جیڈھ آنی گیواری ءِ واستہ ھاسیں گامگیج کنگ بنت۔ محسن نقوی ءَ گوشت کہ اے رد ءَ مئے لاجسٹک ٹیم ھاکی لیب آنی کمک ءَ کنت۔ آئی ءَ دل یکیمی دات کہ ہاکی ءِ گوازی ءِ بحالی ءِ واستہ ہر وڑیں کمک کنگ بیت۔ پی سی بی ءِ چیئرمین ءَ پرو ہاکی لیگ ءِ واستہ راجی ٹیم ءِ کوالیفکیشن ءَ را شرپ ءِ رنگ ءَ پیش کنان ءَ گوشت کہ اے ھاسیں مراگش ءَ راجی ٹیم ءِ بھر زوری ءِ واستہ وتی سرجمیں کرد ءَ پیلو کناں۔