آجوئی دے اناوخت آ کوئٹہ ءِ بھلو بھسکاری سے آن بچفنگا، ملک دشمن زموار، دہشت گرد و اوفتا کمکار آک ہچ ءُ رعایت اسے ناحقدار افس، وزیراعلیٰ بلوچستان

کوئٹہ۔ 18 اگست (اے پی پی) وزیراعلیٰ بلوچستان میر سرفراز بگٹی پارے کہ ملک دشمن زموار ، دہشت گرد و اوفتا کمکارآک ہچ ءُ رعایت اسے نا حقدار افس، اوفتے ہر حال اٹ ایسری انجام اسکان سرکننگک ۔ داخیال آتا درشانی ءِ او دوشنبے نادے آ داڑے پریس کانفرنس آن تران کرساکرے۔ داوخت آ ایڈیشنل چیف سیکرٹری داخلہ حمزہ شفقات ، قائم مقام آئی جی پولیس بلوچستان سعید وزیر، ڈی آئی جی سی ٹی ڈی اعتزاز حسین گورایا، ترجمان صوبائی حکومت شاہد رند ئسک ہم ساڑی ئسر۔ وزیراعلیٰ بلوچستان پارے کہ ملک ءِ پرغوک آتے معاف کننگ مفک و ہرکس کہ دہشت گرد آتا کمک ءِ کیک، اوڑآن و اونا سرپرست آتیان ضرور اَرفنگک۔ وزیراعلیٰ پارے کہ اگہ اسہ پروفیسر اس دہشت گرد جوڑ مرے تو اونا لخ اٹی ہار شاغنگپک۔ پروفیسر ڈاکٹر محمد عثمان قاضی نا دزگیری ءِ میڈیا نا مون آ اتنگ نا مسخت ہندادے کہ دہشت گردی نا حوصلہ شکنی ءِ کننگے۔ اوپارے کہ ریاست نا مقابلہ ہمو زموار آتون ءِ ہرافتے کالعدم تنظیم تا کاٹم خواجہی دوئی ءِ اوپارے کہ 14 اگست آ ننا ادارہ غاک اسہ بھلو بھسکاری اسے بے سہب کریر ہرا داہیت انا شاہدی ءِ کہ ریاست دشمن زموار آتا برخلاف پبی کارروائی کننگ ءِ۔ وزیراعلیٰ پارے کہ پاکستان نا برخلاف جنگ اٹی محرومی اسے نا ہچ ءُ کڑد اس اف بلکن دا خالصتاََ ملک دشمن ایجنڈاءِ۔ اوپارے کہ عثمان قاضی کون آ بڑزکو تعلیم یافتہ بندغ ہراتم دہشت گرد آتا کمکار مرے تو دا ریاست و راج اکن بھلو خطرہ اسے۔ ریاست عثمان قاضی ءِ شرف تس و روزگار تس ولے او ملک دشمن تا کسر ءِ ہلک۔ وزیراعلیٰ پارے کہ عثمان قاضی زالبول کمکار ءِ پشٹول اس تس ہراڑآن سیکورٹی فورس آتا کارندہ شست مس وخت اس کہ او ریلوائی اسٹیشن آ خودکش جلہو اٹی ہم کمکار نا وڑاٹ اوار ئس۔ اوپارے کہ کالعدم تنظیمک کمکاری کن زالبول آتے ہم تینا نیٹ ورک اٹی کاریم اٹ اتیرہ ہرابے کچ گڑتی و افسوزناک ءُ ہیت اسے۔ ہندا پس منظر اٹی تعلیمی ادارہ غاتیکن محکمہ داخلہ ٹی خصوصی سیل اس جوڑ کننگانے تانکہ ورناتے دہشت گردی و انتہاپسندی آن بچفنگ مرے۔ وزیراعلیٰ پارے کہ داتم اسکان اِرا ہزار سرکاری بندغ آتا چھان بین ءِ کننگانے و ہرافتیا شبہ ءِ اوفتے فورتھ شیڈول اٹی شاغنگ انگ ءِ۔ اوفتے ٹی سرکاری ملازم ہم اوار ارے۔ اوپارے کہ بلوچستان اٹی کم شونداری یا زرگزرانی ویل آتے دہشت گردی نا جواز جوڑ کننگ مفک۔ الس تینا چناتیا نظر تخر و اگہ عزیز یا رشتہ دار اس دہشت گرد آتون رابطہ ٹی ءِ  تو دمدستی ریاست ءِ اطلاع ایتر۔ اوپارے کہ بلوچستان ءِ انت کہ حق اس ملانے او پارلیمان نا کمک اٹ ملانے ولے بدبختی اٹ گڑاس پارلیمان نا باسک آک داسکان ابہام نا گواچی ءُ۔ بلوچی نا پن آ ورناتے گمراہ کروک آتا برخلاف پارلیمان ءِ قائدانہ کڑد ادا کروئی مریک۔ وزیراعلیٰ پارے کہ ریاست مدام مظلوم آتون سلوک ءِ و امن کن ہراسٹ تون ہیت کننگ کن تیار ءِ ولے کشت وخون نا موکل کس اسے تننگ مفک۔ اوپارے کہ پنجاب یونیورسٹی ٹی بلوچستان نا طالب علم آتیکن اسہ ارب روپئی نا وظیفہ فراوان کننگ انگ ءِ تانکہ صوبہ نا ورناک تعلیم نا کمک اٹ تینا آخبت ءِ گچین جوڑ کننگ کیر و منفی کسر نا جاگہ غا مثبت سمت ءِ گچین کیر ولے خننگاکہ جامعہ غاتیٹی ساڑی ملک دشمن سرجزآتیٹی اوار حلقہ پوسکن آ طالب علم آتے گھیڑ کرسا تینا نظریہ نا کنڈآ دیک۔ لمہ وباوہ ءِ تینا چناتیا سخت نظر تخسا اوفتے داوڑنا زموارآتیان مرتخوئی مریک۔ پریس کانفرنس اٹی دزگیر پروفیسر ڈاکٹر محمد عثمان قاضی نا ویڈیو بیان ءِ میڈیا ءِ نشان تننگا ہراٹی او تینا ڈوہ ءِ منسا پارے کہ کنا و کنا اُرائی سرکاری ملازم اسے۔ ریاست ننے آ بے شمار احسان کرے، ننے عزت و روزگار تس ولے اوکان پد ہم ای غلط انگا کسر آ پیش تماٹ۔ ای پشاور یونیورسٹی آن پی ایچ ڈی کریٹ و بیوٹمز یونیورسٹی ٹی 18 گریڈ نا لیکچرار نا حیثیت اٹ تدریسی فرض ءِ سرترساکریٹ۔ پشاور آن قائد اعظم یونیورسٹی نا اسہ وزٹ اسے ٹی کنا اوڑدہی مسہ سنگت آتون مس ہرافتا تعلق کالعدم تنظیم بی ایل اے آن ئس۔ او مسٹ آن اِرٹ اوکان پد خلنگار ۔ اوکان پد ڈاکٹر ہیبتان عرف کالک کنتون رابطہ کرے و کنے بی ایل اے ٹی اوار کرفے داوخت آ کنا اوڑدہی ءِ بشیر زیب تون ہم کرفے۔