حکومت نا کاریم کاروبار اف، سازگار چاگڑد فراوان کننگ ءِ، بنجائی وزیر خزانہ محمد اورنگزیب نا جاب فیئراٹی تران

اسلام آباد۔ 18 اگست (اے پی پی) بنجائی وزیر خزانہ و محصولات محمد اورنگزیب پارینے کہ حکومت نا کاریم کاروبار کننگ اف بلکن اوڑکن سازگار چاگڑد فراوان کننگ ءِ، وخت اس کہ زرگزران ءِ مون آدننگ و پائیدار شونداری کن نجی بشخ انا کڑد غٹ آن زیات اہم مریک۔ او دوشنبے نادے آ کراچی ٹی جاب فیئرنا بناءِ کننگ آن پد تران و میڈیا تون گپ وتران کریکہ بنجائی وزیرپارے کہ نجی بشخ ملک انا حقی سرکڑدہ ئی ءِ کیک، ہندا تپہ دے و نن خواری کیک و زرگزرانی سرجزآتے مون آ ودفک۔ جاب فیئر کون آ گام گیج ورناتے روزگار نا وارخواہی فراوان کننگ اٹ کمکار مریک و ملکی زرگزران نا سوگوی کن ہم کمکار مریک۔ اوپارے کہ عملی زند اٹی ہچ ءُ شارٹ کٹ اس مفک ، ورناک تینا خواری ءِ شعار جوڑ کیر و تینا لائخی تے گچین وڑاٹ کاریم اٹ اتیر۔ شیف بڑزی بریک کاہک ولے ٹیلنٹ و خواری تینا جاگہ غا برقرار سلک۔ ننے آخبتی و پائیدار شونداری نا کنڈآ ہنوئی ءِ۔ وزیرخزانہ پارے کہ حکومت ٹیرف اصلاحات درستی راستی کرفینے، اسٹاک ایکسچینج ہڑدے پوسکن ءُ ریکارڈ اس جوڑ کننگ ءِ، و مارکیٹ اٹی ترندی زرگزرانی گچینی نا نشانی ءِ۔ توانائی نا نہاد آتیٹی کمتی نا بابت ہم حکومت سہی کنڈآ ہِننگ ءِ۔ اوپارے کہ مائیکرو اکنامک سوگوی آن گنجائشت ودی مننگ ءِ۔ سٹیٹ بینک کبینی نا گچین وڑاٹ مون ءِ تورینے و بروک آ منہ سال آتیٹی حالیت آک پین جوان مریرہ۔ مسہ بھلا جہانی ریٹنگ ایجنسی تا کنڈآن پاکستان آ بیک وخت پت انا درشانی ہم زرگزران نا سوگوی نا نشانی ءِ۔ محمد اورنگزیب پارے کہ اینو نا دور اٹی مصنوعی ذہانت نا سوب آن شونداری نا پوسکن ءُ وارخواہی ودی مننگ ءِ، ولے انسان تیکن خواری نا ہچ ءُ متبادل اس اف۔ اوسیل و سوات ءِ پاکستان نا اسہ بے کچ اہم بشخ اس گوندا و پارے کہ دانا مون آ دننگ کن ہر زند انا بشخ و مذہب آن تعلق تخوک آتے اواری اٹ کاریم کروئی مریک انتئے کہ سیل و سوات اٹی روزگار و شونداری نا بے شمار پوسکن ءُ وارخواہی ودی کننگ نا لائخی ساڑی ءِ۔