جنگلانی کٹائی ءَ چہ سیلاب ءُ ہوا ءِ آلودگی گیش بوھگ ءَ اِنت، درچک ءِ کشت ءُ کشار ءَ را راجی فرض ءِ رنگ ءَ چارگ المی اِنت، اسپیکر راجی اسمبلی

اسلام آباد۔18اگست  (اے پی پی):راجی اسمبلی ءِ اسپیکر سردار ایاز صادق ءَ گوشت کہ جنگل آنی تہ ءَ ترندیں ھلاسی ءِ سبب ءَ ھئور، زمین ءِ کشگ، سیلاب، ھوا ءِ آلودگی ءُ موسم ءِ نا اُمیتیں بدلی ءِ وڑیں جیڈھ آناں سنگینیں رنگ زرتگ، اے جاور ھال ءَ چہ رکگ ءِ واستہ پلانٹیشن ءَ را راجی درچک ءِ رنگ ءَ چارگ المی اِنت۔ دوشمبے ءِ روچ ءَ راجی درچک کشت ءِ روچ ءِ موہ ءَ وتی کلوہ ءِ تہ ءَ آئی ءَ گوشت کہ درچک کشت ءَ را راجی فرض لیکگ المی انت، جنگل آنی ھلاسی ءِ سبب ءَ ھور، سیلاب ءُ ھوا ءِ آلودگی گیش بوھگ ءَ انت۔ آئی ءَ گوشت کہ موسمی مٹ ءُ مٹ ءَ را کنٹرول کنگ ءِ واستہ ترندیں گامگیج ضلورت انت۔ یک جامع حکمت عملی ءِ سرا عمل کنگ بہ بیت کہ ماحولیاتی بدلی ءِ سبب ءَ بوتگیں آفتانی دیم ءَ دارگ بہ بیت۔ قومی اسمبلی ءِ صدر ءَ گوشت کہ چاگرد ءَ را ساپ ءُ ساپ کنگ مئے اولی ترجی آنی تہ ءَ یک بہ بیت پرچا کہ آیوکیں باھوٹ آناں ساپیں چاگرد پجارینگ مئے درستانی ذمہ واری اِنت۔ جنگل آپ ءِ جذب کنگ ءَ فلیش سیلاب ءَ چہ رکین انت پمیشکا درچک ءِ دیمروئی ءُ رکھینگ ناگزیر انت۔ سردار ایاز صادق ءَ گوشت کہ درچک ماحولیاتی توازن ءُ سیارہ ءِ زیبائی ءِ ضامن انت۔ اسپیکر ءَ گوشت کہ جنگل سیلاب، زمین چنڈ ءُ ھشک سالی ءِ ھترہ آں چہ ھم رکھین ایت، پمیشکا درچک کشت ءَ را دائمی راجی جنبش جوڑ کنگ بہ بیت۔ پاکستان سبز ءُ سرسبز جوڑ کنگ ءِ واستہ الس ءُ حکومت یکجائی ءَ عزم بہ کن انت۔ آئی ءَ گوشت کہ نوں وانگ جاہ ءُ شھر آنی تہ ءَ مزنیں کچے ءَ درچک ءِ کشت ءُ کشار ءِ کمپین کنگ المی بوتگ۔ ایوک ءَ درچک کشت ءُ کشار کنگ نہ بیت، آہانی نگہبانی ھم المی انت۔ پہ پائیداریں دیمروئی ءَ ھر یک مردمے ءَ درچک ءِ کشت ءُ کشار ءِ مہم ءَ سرجمی ءَ بھر زوری کنگی اِنت۔