امن، سیاسی استحکام ءُ ملک ءِ دیمروئی ءِ ھاترا پالیسیانی یک شلی ءِ ضلورت اِنت، احسن اقبال

لاہور۔17اگست (اے پی پی): منصوبگ بندی ءُ دیمروئی ءِ وفاقی وزیر احسن اقبال ءَ گشتگ کہ پاک چین ءِ سیادی وھد ءِ گوما مھکم ءُ گہتر بوھگ ءَ انت۔ مذکورہ منصوبگ ءَ چہ جان سلامتی ءِ شوبگ، ریسکیو ءُ ایندگر شوبگ آنی تہ ءَ نوکیں ٹیکنالوجی ءُ کمک رس ایت۔ آئی ءَ یک شمبے ءِ روچ ءَ نارووال ءَ چین ءِ کمک ءَ جان سلامتی ءِ شوبگ ءَ نوکیں منصوبگ ءِ بنگیج ءِ مراگش ءَ گوں گشتانک دیگ ءَ ات۔ احسن اقبال ءَ گوشت کہ مرچی جان سلامتی ءِ شوبگ ءَ ’’ہیلتھ سلک روٹ‘‘ ءِ بنگیج ءِ روچ انت ایشی ءَ چہ پاکستان ءُ چین ءِ نیام ءَ نوکیں راہداری ءِ جوڑ کنگ بیت۔ اے راہداری زانت، ٹیکنالوجی ءُ پٹ ءُ پول ءِ سرا بندوک بیت تانکہ دوئیں ملک یکے دومی ءِ تجربگ ءُ وسیلگاں چہ راجمانی جان سلامتی ءِ پڑ ءَ ہم فائدہ چست بہ کن انت۔ آئی ءَ گوشت کہ دگنیا ءَ اگاں کسے ءَ اقتصادی دیمروئی ءِ کرامات پیش داشتگ گڈا آ چین انت کہ آئی ءَ 800 ملین مردم گریبی ءَ چہ کش اتگ انت ءُ وشحالی ءِ راہ ءَ ایر کتگ انت۔ پاکستان سی پیک ءِ وڑیں منصوبگ آنی وسیلگ ءَ اے دیمروئی ءِ سفر ءَ وتی ملک ءَ سر کنگ ءِ واستہ گامگیج کنگ ءَ انت۔ ملک ءِ دیمروئی ءِ واستہ امن، سیاسی برجائی ءُ پالیشیانی برجائی ءِ ضلورت انت، ایوک ءَ ایشی ءَ چہ پاکستان ھم دیمروئی ءُ وشحالی ءِ نوکیں سفر ءَ رھادگ بوت کنت۔ وفاقی وزیر ءَ گوشت کہ پاکستان ءِ آجوئی ءِ روچ سرجمیں راج ءِ واستہ وشھالی ءِ کلوہ اِنت، اے سال ءِ آجوئی ءِ روچ مئے واستہ ھاسیں ارزشت ءِ واھند اِنت۔ آئی ءَ گوشت کہ انصاف ءِ جنگ ءَ دژمن ءَ را داتگیں سبق نسل آناں یات ءَ مان ایت، اللہ تعالیٰ ءَ پاکستان ءَ را یک مزنیں سوبمندی ءِ نعمت داتگ ایشی ءِ واستہ سرجمیں راج وتی بہادریں سلاہ بندیں اُرد آناں شگر ءُ منت ءَ پیش کنت۔ احسن اقبال ءَ خیبر پختونخوا ءَ ھئور ءُ سیلاب ءَ چہ آماچیں ھاندان ءِ گوما ھمدردی ءِ درشانی کت ءُ گوشت کہ سرجمیں راج ھیلی کاپٹر ءِ ٹکر ءُ سیلاب ءَ گران بھائیں جانانی بیرانی ءَ چہ دلپدرد اِنت۔ آئی ءَ وتی گشتانک ءِ تہ ءَ گوشت کہ نشان امتیاز ءِ رسگ ءِ اصل کریڈٹ آئی ءِ ووٹر ءُ ھما مردم آنی سر ءَ انت کہ آھاں مدام آئی ءِ سر ءَ بھروسہ کتگ۔