مئے انٹیلی جنس ادارگاں ہندوستان ءُ پاکستان ءِ جنگ ءَ ناقابل فراموشیں کرد پیلو کتگ، وفاقی وزیر داخلہ محسن نقوی

لاہور ۔17اگست (اے پی پی): وفاقی تہی کارانی وزیر محسن نقوی ءَ پاکستان ءِ فوج، فضائیہ ءُ بحریہ ءِ افسر ءُ مرد آناں شگر ءُ منت درشان کنان ءَ گوشت کہ بھارت ءُ پاک جنگ ءِ وھد ءَ مئے انٹیلی جنس ادارگ آناں ناقابل فراموشیں کرد پیلو کتگ۔ آئی ءَ یک شمبے ءِ روچ ءَ ایوان اقبال ءَ پروفیسر وارث میر فاؤنڈیشن ءِ نیمگ ءَ برجم داشتگیں ’’بھارت ءِ سر ءَ پاکستان ءِ فوجی ءُ سفارتی سوبمندی آنی جھان ءِ اثر‘‘ ءِ سرھال ءِ سر ءَ سیمینار ءَ گوں تران کنگ ءَ ات۔ آئی ءَ گوشت کہ ھندوستان ءَ چہ جنگ ءِ وھد ءَ بازیں واکیہ آنی وتی چم ءِ گواہ آں۔ انٹیلی جنس ایجنسیانی منت ءَ ہندوستان ءِ بابت ءَ ھمک چیز مئے ادارہاں چہ وھد ءَ باز پیسر اتکگ۔ وھدے کہ آ چیزے ءِ منصوبہ بندی کنگ ءَ اتنت یا وھدے کہ آھانی بالی گراب بال کنگ ءَ اتنت گڑا مئے ادارہاں آھانی رسائی رس اتگ ات۔ مئے اطلاعات ادارہ ءِ افسر بے تواریں جنگول انت ءُ آہانی کرد اے جنگ ءَ سک باز بوتگ۔ وزیر داخلہ محسن نقوی ءَ گشتگ کہ مئے کرّا ہندوستان ءِ ھمک یک چیزے، ھمک یک پیسلہ ءُ ھمک یک کاگدے پیشگی بوتگ۔ ایشی ءَ چہ پد وہدے آہانی بالی گراب ایر کپت انت گڈا اے فیصلہ کنگ بوت کہ داں ثبوت مہ بیت ما اے جار ءَ نہ جنیں کہ ما انچو بالی گراب ایر جتگ۔ مارا میدان ءَ ثبوت ءِ زلورت ات ءُ من ءَ باور کن ات، مئے کرّا منٹانی تہا ثبوت ات۔ مئے کرّا 6 ھندی بالی گرابانی تیرگواری ءِ ویڈیو ھست اَنت۔ من مرچی اے پُشت ءِ جنگولاں گیشتریں شگر ءُ منت گپت کناں پرچا کہ آہانی نام کمتر گرگ بنت۔ آئی ءَ گوشت کہ مارا اللہ تعالیٰ ءِ غیبیں کمک ھم رستگ۔ ہندوستان ءَ مئے یک اڈہ ءِ سرا 7 میزائل تیر گواری کتگ ءُ اے مئے مستریں اڈہ بوتگ ءُ وھدے میزائل تیرگواری کنگ بوتگ انت گڑا ما زانتگ کہ اے میزائل پاکستان ءِ نیمگ ءَ آھگ ءَ انت ءُ ما سرپد بوتگیں کہ میزائل کجام اڈہ ءِ نیمگ ءَ روگ ءَ انت پمیشکا ھرکس پریشان بوتگ کہ مئے ارزشت داریں اثاثہ ھمے اڈہ ءِ سر ءَ انت۔ باور کن اِت کہ اے 7 میزائلانی تہ ءَ یکے ھم بیس ءِ تہ ءَ نہ کپتگ۔ لہتیں اولی رند ءَ کپت ءُ لہتیں بیس ءِ دپ ءَ کپت، لہتیں کش ءَ کپت۔ آئی ءَ گوشت کہ ما وتی جوانیں کوشست کتگ کہ بھارت ءَ را ڈرامہ ءِ لئیب کنگ ءِ ھچ وڑیں موہ مہ دئیں۔ ہما میزائل کہ ما ہندوستان ءِ فوجی تنصیبات ءِ سرا شنگ کتگ اتنت آ آبادی ءِ نزیک ءَ اتنت۔ اے ترس ات کہ میزائل شھمکی مردمانی سرا نہ کپ انت۔ اللہ تعالیٰ ءِ نادیدہ کمک ءَ آ میزائل ہندوستان ءِ اے دمگ ءِ مزنیں تیل ءِ ذخیرہ کنگ ءِ ڈپو ءِ سرا کپت انت ءُ آ تباہ بوت۔ اللہ تعالیٰ ءَ دوئیں واقعہانی تہا مئے کمک کتگ۔ تہی کارانی وزیر محسن نقوی ءَ گوشت کہ بھارت ءَ نور خان ءَ ھوار بالی اڈہ آنی سر ءَ ھم اُرش کتگ ۔ مارا ہچ وڑیں تاوان نہ رستگ۔ مئے سرمچار ایوک ءَ یک بنجاہے ءَ شھید بیتگ اَنت۔ اے درست اللہ تعالیٰ ءِ کمک ءِ سوب ءَ بوتگ انت۔ کہ ایشی ءِ سبب ءَ مارا اے غیر معمولی سوبمندی رست۔ اگاں یک مردمے یک مھکمیں جزمے بہ کنت ءُ گوں دلجمی ءُ ایمان ءَ پیسلہ بہ کنت گڑا من گواہی دات کناں کہ اللہ تعالیٰ ھم کمک کنت۔ جنگ ءِ وھد ءَ فیلڈ مارشل سید عاصم منیر ءَ گوں تمردی ءُ بہادری ءَ رھشونی کُت۔ سعودی سرکار ءِ یک ڈلے جنگ ءِ وھد ءَ پاکستان ءَ اتک، مزن وزیر ءُ فیلڈ مارشل ھم دیوان ءَ ساڑی ات، نائب مزن وزیر ھم ات ءُ من ھم اتاں۔ اے ڈل چہ ھندوستان ءَ پاکستان ءَ اتکگ ات ءُ امن ءِ گپ ءَ ات انت ۔ فیلڈ مارشل ءَ ڈل ءَ را گشت کہ اے ہندوستان چو چمکداریں مرسڈیز ءَ انت بلے ما چو ڈمپر ٹرک ءَ ایں کہ سنگ ءُ دگہ چیزاں چہ پُر انت، نوں شما اندازہ جت کن ات کہ اے مرسڈیز ءِ ٹکر ءِ وھد ءَ چے بیت، کہ ڈل ءِ باسکاں ھچ نہ گشت۔ محسن نقوی ءَ گوشت کہ پاکستان ءِ راجدپتر ءَ اولی رند ءَ پاکستان ءِ آرمی، فضائیہ ءُ بحریہ ءَ یکجائی حکمت عملی جوڑ کتگ ءُ یک حکمت عملی ءِ چیر دستی ءَ جنگ کتگ۔ دومی نیمگ ءَ بھارتی ایئر فورس ءِ سروک مودی ءَ گوں جتا گند ءُ نند کنگ ءَ ات، آئی ءِ آرمی چیف مودی ءَ گوں جتا گند ءُ نند کنگ ءَ ات ءُ آئی ءِ نیول چیف مودی ءَ گوں جتا گند ءُ نند کنگ ءَ ات، آئی ءِ ایئر فورس ءُ آرمی ءِ نقطہ نظر سرجم ءَ جتا اتنت ءُ آ انچو بھمک ءُ بانگ اتنت کہ آئی ءَ وت نتیجہ دیستگ ات۔ آئی ءَ گوشت کہ ھرکس مودی ءِ نام ءَ زوریت ءُ جیڑ ایت کہ اے درستانی پُشت ءَ مودی اِنت، من ترا دو کردار گْوشگ لوٹ آں کہ آ اصل ءَ ھندی سرکار ءَ چلائینگ ءَ اَنت ءُ اے سرجمیں ڈرامہ ءِ پُشت ءَ اَنت یکے اجیت ڈوول ءُ دومی امیت شاہ۔ اے دوئیں ہما مردم اَنت کہ اصل ءَ اے سرجمیں ڈرامہ ءِ پُشت ءَ بوتگ اَنت ءُ اے دوئیں کردار ہندوستان ءَ ڈوبین اَنت ءُ مودی ءَ ہم ڈوبین اَنت ءُ شما آیوکیں وھد ءَ گند اِت کہ آ کجام آفت ءَ سر بوتگ اَنت۔ دومی نیمگ ءَ مئے سیاسی گل یکجاہ بوتگ اَنت، آہانی نیام ءَ ہچ وڑیں پرک نیست اَت۔ مزن وزیر بہ بیت، کجام ھم پارٹی، مولانا فضل الرحمن یا کجام ھم پارٹی۔ ھمک کس یکجاہ ات۔ آ رابطہ ءَ اتنت ءُ یکے دومی ءِ حمایت ءَ اتنت۔ ہندوستان ءِ ڈل امریکہ ءَ شت ءُ لابی کنگ ءِ جہد کت بلے بے سوب بوت بلے مئے پیپلز پارٹی ءِ چیئرمین پہ آہاں سک باز زبردست ات۔ تہی کارانی وزیر محسن نقوی ءَ گوشت کہ بھارت پاکستان ءَ ھاسیں رنگ ءَ بلوچستان ءَ ناشرکاری ءَ را پدریں رنگ ءَ سرپرستی کنگ ءَ انت۔ سپتامبر ءَ چہ ناشرکاری ءَ چہ ہندوستان ءَ گیشتریں نپ رستگ۔ اے جنگ ءَ کارمرز کنان ءَ ھندوستان ءَ کشمیری سرکوب کت انت ءُ کشمیری راج ءِ سیاسی تحریک ءَ را ناشرکاری تحریک ءِ تہا بدل کنگ ءِ بے سوبیں کوشست کت۔ بھارت ءِ اُرش ءَ پد پاکستان ءِ سر ءَ بازیں زور ءُ زوراکی یے بوتگ کہ آ پسو مہ دنت بلے ایشی ءِ باوجود مزن وزیر ءُ فیلڈ مارشل دوئیں کریڈٹ ءِ مستحق اَنت کہ آیاں اے درستیں زور ءِ دیم ءَ اوشتاتگ ءُ پدا بھارت ءَ را لائکیں پسو داتگ۔ سیمینار ءِ تہ ءَ چیئرمین سینیٹ سید یوسف رضا گیلانی ءُ اسپیکر پنجاب اسمبلی ملک محمد احمد خان ءَ ھم گشتانک دات۔