وفاقی وزیر اورنگزیب خان کھچی  لوک ورسا ءَ آجوئی ءِ روچ ءُ راستی ءِ جہد ءِ مراگش ءَ بہر زورگ ءَ انت

اسلام آباد۔14اگست  (اے پی پی):راجی ورثہ ءُ دود ءُ ربیدگ ءِ وفاقی وزیر اورنگزیب خان کھچی  ءَ آجوئی ءِ روچ ءُ راستی ءِ جہد ءِ موہ ءَ پنچ شمبے ءِ روچ ءَ لوک ورسا ءَ برجم داشتگیں مراگش ءَ بہر زرتگ۔ اے موہ ءِ سر ءَ پارلیمانی سیکرٹری فرح ناز اکبر، سیکرٹری راجی میراث ءُ دود ءُ ربیدگ اسد رحمان گیلانی ءُ ایگزیکٹو ڈائریکٹر لوک ورسا ڈاکٹر وقاس ھم ساڑی بوتگ انت۔ وزارت راجی میراث ءُ دود ءُ ربیدگ ءِ رد ءَ مراگش ءِ بندات آجوئی ءِ روچ ءُ راستی ءِ جہد ءِ درگت ءَ کیک ءِ چٹگ ءَ گوں کنگ بوت۔ وفاقی وزیر ءَ اے موہ ءِ سر ءَ گوشت کہ آجوئی ءِ روچ نہ ایوک ءَ مارا آجوئی ءِ ارزشت ءُ ایشی ءِ واستہ کتگیں قربانی آنی یات ءَ دنت بلکینگ ءَ اے جزم ءِ نوک کنگ ءِ روچ ھم اِنت کہ ما وتی دود ءُ ربیدگ، تہذیب ءُ راجی مڈی ءَ را ہر قیمت ءَ رکھینگ ءَ ایں ۔ آئی ءَ گوشت کہ انوگیں پاکستان ءُ ھندوستان ءِ کش ءُ گور ءَ یک رندے پدا آجوئی ءِ ارزشت ءُ ایشی ءِ رکھینگ ءِ واستہ راجی یکوئی ءِ ضلورت یات ءَ داتگ۔ آئی ءَ گوشت کہ آجوئی ءِ رکھینگ بید ءِ قربانی ءُ یکوئی ءَ گوں بوت نہ کنت، ءُ سرجمیں راج وطن ءِ رکھینگ ءِ واستہ سیسہ ءِ دیوال ءِ وڑ ءَ انت۔ وفاقی وزیر ءَ لوک ورسا ءَ راستی ءِ جہد ءَ ھوالگ ءَ فوٹو نمائش ءُ دود ءُ ربیدگ ءِ پروگرام آنی ھم تر ءُ تاب کت ءُ ساڑات۔ آئی ءَ گوشت کہ مئے دود ءُ ربیدگ ءِ ھزاراں سال آنی راجدپتر اِنت ءُ اے مئے پجار ءِ بنیاتی بھر اِنت۔ مراگش ءِ تہ ءَ بھر زوروکاں مھروانیں وطن ءِ آجوئی، راجی یکوئی ءُ شھید آنی قربانی آناں شگر ءُ منت گپت ءُ دژمن ءِ منصوبگ آناں ناکام کنگ ءِ جزم ءِ درشان کت۔