چیئرمین مزن وزیر ءِ ورنا پروگرام رانا مشہود احمد خان ءَ سرجمیں راج ءَ را آجوئی ءِ روچ ءِ مبارک بات

اسلام آباد۔14اگست  (اے پی پی):  چیئرمین مزن وزیر ءِ ورنا پروگرام رانا مشہود احمد خان ءَ سرجمیں راج ءَ را آجوئی ءِ روچ ءِ مبارک بات دیگ ءِ وھد ءَ گوشت کہ ما درست یکجاھی ءَ وعدہ بہ کن ایں کہ ما پاکستان ءَ را معاشی، فکری ءُ دفاعی رد ءَ ناقابل شکست جوڑ کن ایں ۔ پنچ شمبے ءِ روچ ءَ آجوئی ءِ روچ ءِ موہ ءَ وتی ھاسیں پیغام ءِ تہ ءَ آئی ءَ گوشت کہ الحمد اللہ مرچی ما یک راجے ءِ بستار ءَ 78می آجوئی ءِ روچ ءَ برجم دارگ ءَ ایں اے روچ نہ ایوک ءَ مارا قربانی آنی یات ءَ دنت بلکن ءَ مارا یک موہ ءِ ھم دنت کہ ما وتی جزم ءِ نوک کنگ ءَ ایں کہ ما دیمروئی ءِ ھرچ وڑیں کرد ءَ پیلو کن ایں ۔ آئی ءَ گوشت کہ آجوئی اللہ تعالیٰ ءِ نیمگ ءَ داتگیں مزنیں نعمت اِنت، اے نعمت ءِ ھلاپ ءَ ھمک روچ سازش جوڑ کنگ بوھگ ءَ اِنت۔ اگاں ما آجوئی ءِ راستیں ارزشت ءَ زانگ لوٹ ایں گُڑا شام، عراق، لیبیا، مصر ءُ فلسطین ءِ مظلومیں مہلوک ءَ جُست بہ کنیں کہ آہانی ھون مرچی دنیا ءِ ضمیر ءَ لرزگ ءَ انت۔ اے دمگانی ھلاس کنگ مارا یات کنت کہ آجوئی چنچو گران بھائیں ءُ نازرک اِنت، یک انچیں نعمتے کہ ھر ساھت ءَ آئی ءِ رکھینگ المی اِنت۔ آئی ءَ گوشت کہ مئے آجوئی ایوک ءَ زمینی سیمسر ءِ نام نہ اِنت بلکیں یک نظریہ ءِ نمائندگی اِنت، یک فکرے ءُ یک جھان ءِ پیغامے، یک پیغامے کہ ایشی ءِ بُن ھشت برابری، وت مہ وتی ءُ مظلوم آنی کمک اِنت۔ اے سبب اِنت کہ پاکستان ءِ نظریاتی بُن ھشت پہ دگنیا ءِ ھما مظلومیں تبکاں اُمیت ءِ شعاع اَنت، کہ آھاں اقتدار ءِ ھالانی تہ ءَ توار نہ رس اِیت۔ آئی ءَ گوشت کہ ما زان ایں کہ مرچی ھم پاکستان ءِ ھلاپ ءَ درائیں پندل سازگان انت۔ مئے ذہن پنچمی نسل ءِ جنگ ءِ وسیلہ ءَ نشانگ جوڑ کنگ بوہگ ءَ انت، ءُ مئے ورنائیں نسل ءَ را گمراہ کنگ ءِ جہد کنگ بوہگ ءَ انت۔ بلے مارا اے گپ ءِ سر ءَ پھر  اِنت کہ پاکستان ءِ ورنا انگت بیدار اَنت، سرپد اَنت ءُ دلیر اَنت۔ اے ورنا اے ملک ءِ اصل مڈی انت، کہ نہ ایوک ءَ پاکستان ءَ ایمن دارگ ءَ انت بلکیں دنیا ءِ تہا ایشی ءِ رژنائیں دیم جوڑ بوتگ انت۔ آئی ءَ گوشت کہ مرچی الحمد اللہ پاکستان فری لانسنگ، ای کامرس، ءُ آئی ٹی ءِ شوبگ آنی تہ ءَ جھان ءِ تک ءَ نامدار بوھگ ءَ اِنت۔ مئے برآمدات گیش بوھگ ءَ انت، مئے ورنائیں نسل دگنیا ءِ دیمروئی کتگیں شوبگ آنی تہ ءَ پاکستان ءِ بیرک ءَ را چست کنگ ءَ انت۔ اے درست اے راج ءِ زندگیں روح ءُ ورناہانی شپ ءُ روچ محنت ءِ گواہی انت۔ آئی ءَ گوشت کہ آجوئی ءِ روچ ءِ اے موہ ءَ ما وتی شہید آناں شگر ءُ منت ءَ پیش کن آں، ءُ وتی ورنا آں کہ اے ملک ءِ آیوکیں باندات اَنت۔ بیا اِت ما درست یکجاہ ءَ وعدہ بہ کنیں کہ ما پاکستان ءَ را معاشی، فکری ءُ دفاعی رد ءَ ناقابل شکست جوڑ کنیں۔ آئی ءَ گوشت کہ پاکستان ءِ آیوکیں وھد مئے ورنا آنی دست ءَ اِنت — ءُ ھمے دست آنی تہ ءَ باور، جزم ءُ توانائی ءِ زور اِنت۔ پاکستان مدام مھکم ءُ پائیدار بہ بیت۔