14اگست ہمو عظیم جہد و بے مثل قربانی تا شاہدی ءِ ہرا برصغیر نا مسلمانک پاکستان نا جوڑکننگ کن تسر، چیئرمین سینیٹ سید یوسف رضاگیلانی

اسلام آباد۔ 14 اگست (اے پی پی) چیئرمین سینیٹ سید یوسف رضاگیلانی آجوئی دے انا وخت آ تینا خصوصی کلہو اٹی مچ آقوم ءِ مبارکبادی ترسا پارے  کہ 14 اگست نا دے نئے بیرہ آجوئی نا نہادی نعمت نا یات ترفک بلکن ہمو عظیم جہد وبے مثل قربانی تاہم شاہدی ءِ ہرا برصغیر نا مسلمانک پاکستان نا جوڑ کننگ کن تسر۔ سینیٹ سیکرٹریٹ آن جاری بیان اٹی اوپارے کہ ننا بزرگ و سرکڑدہ غاک اُرا، جائیداد و جون تے ندر کرسا اسہ آجو و وتواجہ مملکت اسے نا جوڑ کننگ ءِ ممکن کریر ہراڑے نن تینا دین، دودوربیدہ و روایت آتا رداٹ زند ءِ تیر کننگ کین، دا قربانی بروک آ چین تیکن مدام کسر نا ڈیوامریک و داہیت انا شاہدی ءِ کہ اسہ پرعزم و یکجاقوم ہرمزل ءِ دوئی کننگ کیک۔ چیئرمین سینیٹ پارے کہ پاکستان نا جوڑ مننگ علامہ محمد اقبال نا تغ انا تعبیر و قائد اعظم محمد علی جناح نا جیرت مندانہ کماشی نا بھرم ئس۔ اوپارے کہ 14 اگست 1947ء آ پاکستان دنیا نا نقشہ غا اسہ آجو و وتواجہ ملک اسے نا حیثیت اٹ مون آبس، آجوئی اسہ بے بہا ءُ نعمت اسے و اونا رکھ، بقاو سوگوی ہرپاکستانی نا اسیجائی فرض ءِ۔ سید یوسف رضاگیلانی غٹ پارلیمنٹرین آ زور شاغا کہ او سیاسی تعلقداری تیان ایڑتر مرساملک انا شونداری، شونہالی و سوگوی کن خلوص ءِ نیت اٹ تینا کڑد ءِ اداکیر۔ داوخت آ او سلہہ بند فوج، سیکورٹی ادارہ و کانود نافذ کروک آ کارندہ غاتے خراج تحسین پیش کرے ہرا تینا جون تا پرواہ ءِ کننگ آن بیدس ملک انا آجوئی و وتواجہی نا محافظ آک ءُ۔ چیئرمین سینیٹ تینا کلہو اٹی کشمیری و فلسطینی الس ءِ ہم یات کرے ہرا ظلم و جور انا برخلاف تینا جہد ءِ برجاتخانے و باوری کرفے کہ پاکستان اوفتا اخلاقی ، سفارتی و سیاسی مخ تفی ہمووخت اسکان برجاتخک ہراتم اسکان او تینا مزل ءِ دوئی کپسہ۔