آجوئی نادے، وزیراعظم محمد شہباز شریف پاکستان مونومنٹ اٹی بیرک ءِ چست کرے و یات گار شہید آتیا پھل شاغا

اسلام آباد ۔ 14 اگست (اے پی پی) وزیراعظم محمد شہباز شریف آجوئی نادے انا وخت آ پاکستان مونومنٹ اٹی بیرک ءِ چست کرے و یات گار شہید آتیا پھل شاغا۔ پنچ شنبے نادے آ آجوئی دے انا وخت آ یات گار شہید آتیا مرکزی دود اس اڈ ہلک ہرانا مہمان خاص وزیراعظم محمد شہباز شریف ئس۔ علاقائی لویس اٹی ملبوس کودک آ چناک وزیراعظم ءِ پھل تسر وخت اس کہ وزیراعظم چناتتون مہرومریبت کرے۔ داوخت آ سائرن و قومی ترانہ ءِ خلنگا۔ وزیراعظم یات گار شہید آتیا حاضری تس، پھل شاغا و لمہ وطن آ جون ءِ ندر کروک آ شہید آتے خراج عقیدت پیش کرسا اوفتا درجہ غاتا بڑزی کن دعاپاتیاکرے۔ داوخت آ وزیراعظم ملک انا سلامتی و شونہالی کن دعاکرے۔ داوخت آ چناتا بھلو کچ اس ہم ساڑی ئسر۔ چیئرمین سینیٹ  سید یوسف رضاگیلانی، اسپیکر قومی اسمبلی سردار ایازصادق، نائب وزیراعظم و وزیرخارجہ سینیٹر محمد اسحاق ڈار، ڈپٹی اسپیکر سید غلام مصطفیٰ شاہ، بنجائی وزیر رانا تنویرحسین، عطاء اللہ تارڑ، ڈاکٹر طارق فضل چوہدری، سردار محمد یوسف، پروفیسر احسن اقبال و محمد حنیف عباسی آن بیدس بھلو کچ اسے ٹی قومی اسمبلی نا باسک و ایلوبندغ آک ساڑی ئسر۔