پاکستان ءُ آذربائیجان ءِ نیام ءَ تجارتی، معیشت ءُ دمگی رابطہ ءَ را دیمروئی دیگ ءِ ضلورت انت، صدر آصف علی زرداری

اسلام آباد۔13اگست  (اے پی پی): آذربائیجان ءِ سفیر خازر فرہادوف ءَ صدر آصف علی زرداری ءَ گوں صدارتی ایوان ءَ گند ءُ نند کت۔ صدر ءِ مملکت ءَ دوئیں ملک آنی نیام ءَ تجارت، معیشت ءُ دمگی رابطہ ءِ دیمروئی ءِ ضلورت ءِ سر ءَ زور پر دات۔ چار شمبے ءِ روچ ءَ صدارتی ایوان ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ دوئیں ملک آنی مفاد ءِ واستہ پاکستان ءُ آذربائیجان ءِ نیام ءَ براتی سیادی آناں گیش مھکم کنگ ءِ ضلورت ءِ سر ءَ زور پر دات۔ صدر ءِ مملکت ءَ گوشت کہ دوئیں ملک آنی نیام ءَ تجارت، معیشت ءُ دمگی رابطہ ءِ دیمروئی ءِ ضلورت اِنت، براہ راست بالی رابطہ ءِ وسیلگ ءَ تجارت ءُ مردم ءِ نیام ءَ سیادی ءِ واستہ نوکیں موہ پچ بنت۔ آئی ءَ آذربائیجان ءُ آرمینیا  ءَ را امن معاہدے ءِ سر ءَ دستخط کنگ ءِ سر ءَ ھم مبارکی دات۔ آئی ءَ گوشت کہ امن معاہدہ خطہ ءِ تہ ءَ دائمی برجائی ءُ وشھالی ءِ ضمانت اِنت ءُ پاکستان جیڈھ آناں گیواری ءِ واستہ گپ ءُ تران ءُ امن وسیلگ آنی سر ءَ  دل یکیمی دار ائیت۔