خراج بیس اٹی ودکی، توانائی اصلاحات و زرکار آتا ودوک آپت زرگزران نا سوگوی نا شاہدی ءِ، وزیرخزانہ محمد اورنگزیب

اسلام آباد۔ 13 اگست (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ ملکی زرگزران مثبت کنڈآ ہِننگ ءِ، غٹ اہم زرگزرانی ٹک آک گچین مننگ ءُ و کاروباری و صارف آتا پت تاریخی کہول آ سرمسنے۔ اسلام آباد و اولپنڈی نا چیمبرز آف کامرس اینڈ انڈسٹری ٹی جتا جتا دود آتیان تران کرسا اوپارے کہ کشاری کٹیاءِ خراج نیٹ اٹی اوار کننگانے، آئی پی پیز تون معاہدہ غاتا اول سرآن ترتیب و توانائی بشخ انا اصلاحات اٹی بجلی نا نہاد آتیٹی کمتی بسنے و بروک آدے تیٹی توانائی نا خڑچ آتیٹی پین کمتی گمانی ءِ۔ وزیرخزانہ پارے کہ پالیسی ریٹ 23 درسد آن کم مرسا 11 درسد آبسنے و پین کمتی نا گمان ءِ۔ پاکستان اسٹاک ایکسچینج تاریخ نا بڑزکو کہول 145،976پوائنٹ آتیا سرمسنے ہرا زرکارآتا پت انا پیدوار درشانی ءِ وخت اس کہ سی ای اوز نا پت اٹی 84 درسد ودکی ریکارڈ کننگانے۔ وزیرخزانہ پارے کہ جہانی مالیاتی ادارہ و ریٹننگ ایجنسیک پاکستان نا اصلاحات نا ستاءِ کرینو۔ فچ واسہ پین جہانی ایجنسی سے نا کنڈآن ملکی ریٹنگ ءِ گچین کننگانے و مسٹ میکو ایجنسی ہم زوت اپ گریڈ کیک۔ اوپارے کہ امریکہ تون واپاری معاہدہ غان برآمد آتا پوسکن ءُ وارخواہی ملنگانے و داسال انا ایسر اسکان پانڈا بانڈ انا جاری کننگ نا کوشست کننگ انگ ءِ۔ اوپارے کہ ملکی وام تیٹی 41 درسد ودکی اسہ چیلنج اسے ولے ادائیگی تتون دا زور کم مریک۔ تدوک آ سال وام تا خڑچ اٹی اسہ ہزار ارب روپئی نا کمتی بس و برجاسال ہم ہنداخہ ہی بچت گمانی ءِ۔ خڑچ آتیٹی کمتی کن رائٹ سائزنگ نا پالیسی ءِ تینا کننگانے، 43 وزارت و 400 آن زیات محکمہ غاتیٹی اصلاحات برجاءِ، وخت اس کہ سول ادارہ غاتیٹی پنشن اصلاحات کننگانے۔ بنجائی وزیر پارے کہ خراج نظام اٹی ساڑی خامی تے مرکننگ انگ ءِ، ایف بی آر نا ڈیجیٹائزیشن برجاءِ و وزیراعظم شہباز شریف تینٹ اصلاحاتی عمل نا چاروکی ءِ کننگ ءِ۔ اوپیدوار کرے کہ خراج آتا مچ آ بھاریم تنخواہ دار تپہ غا شاغنگ مفک، ہنداسوب آن خراج نیٹ ءِ ودفنگ آن بیدس پین ہچ ءُ چارہ اس اف۔ محمد اورنگزیب پارے کہ حکومت نجکاری نا عمل ءِ ترند کننگ ءِ و توانائی بشخ اٹی 78 سال اٹی اولیکو وار ٹیرف اصلاحات نا بناءِ کننگانے۔ توانائی نا نسخانک کم مسنو و بجلی نا نرخ پین کم کننگ کن ٹاسک فورس سرگرم عمل ءِ۔ اوپارے کہ حکومت نا اولیت حقیقت پسندانہ و سلابتی پالیسی سازی ءِ۔ بلال کیانی نا کماشی ٹی ماہانہ بنداو تیا چیمبرز تون اوڑدہی مریک تانکہ صنعت کار و پوریاگرآتا گڑتی تا وخت آ ازالہ ءِ کننگ مرے۔ وزیرخزانہ پارے کہ نن غٹ اسہ ہی قافلہ نا مسافر اُن و مزل اسٹ ءِ، پاکستان ءِ اسہ شونہال، سوگو و شون ہلوک ءُ ملک اس جوڑ کننگ۔