یوٹیلیٹی اسٹورکارپوریشن نا بندش آن زہمی مروک آ ملازم آتیکن 20 ارب روپئی نا پیکج اس اتنگ انگ ءِ، رانا تنویر حسین

اسلام آباد۔ 13 اگست (اے پی پی) بنجائی وزیر رانا تنویر حسین پارینے کہ یوٹیلیٹی اسٹور کاپوریشن نا بندش آن زہمی مروک آ آخبتی و کنٹریکٹ ملازم آتیکن 20 ارب روپئی نا پیکج اس اتنگ انگ ءِ، آخبتی ملازم آک اگہ پیکج ہلنگ خوارہ تو او ہلنگ کیرہ اگہ پین ادارہ سے ٹی ایڈجسٹ مننگ خوارہ تو اوفتے ایڈجسٹ کننگک وخت اس کہ اسپیکر دا ویل آ دیوان اس بٹنگ نا پارت کرے۔ چارشنبے نادے آ قومی اسمبلی ٹی پیپلزپارٹی نا باسک آصفہ بھٹو زرداری اعتراضی ٹک آ یوٹیلیٹی اسٹورز آتا بندش نا باندات ءِ ہرفے و پارے کہ وزیر موصوف داڑے باوری کرفیسس کہ دا بند مفننگ ءِ ، حکومت اونا ورندی ءِ ایتے۔ بنجائی وزیر رانا تنویرحسین پارے کہ یوٹیلیٹی اسٹور نا بابت ای دا ایوان اٹی باوری کرفیسٹ کہ یوٹیلیٹی اسٹورز بند مفننگ ءُ، ای 6 تُو مست وزارت ءِ ہلاٹ اوکان پد دا فیصلہ ءِ کننگا۔ اوپارے کہ اوکان پد کابینہ نا رائیٹ سائزنگ کن کمیٹی جوڑ کننگا، او اونا بندش نا فیصلہ ءِ کرے ۔ اولیکو ریسہ ٹی نسخان اٹی چلینگوک آ اسٹور آتے بند کننگا و ڈیلی ویجز ملازم آتے کشنگا۔ ولے آخبتی و کنٹریکٹ ملازم آتیکن 20 ارب روپئی نا خڑک پیکج اس تننگ انگ ءِ، ہرا آخبتی ملازم ءُ اوفتے ایڈجسٹ کننگک و ہرا پیکج ہلنگ خواہک اودے پیکج تننگک۔ اوپارے کہ یوٹیلیٹی اسٹور نا کمک اٹ 20 ارب روپئی نا روچہ پیکج تننگ نا جاگہ غا نن وزیراعظم نا پارت آ حقدار آتے براہ راست کیش تسن۔ اوپارے کہ کیش آن او مرضی و ضرورت نا گڑاتے ہلنگ کیرہ۔ اوپارے کہ یوٹیلیٹی اسٹور آتے بند کننگانے، ملازم آک دھرناتسر و اوفتے تون مذاکرات مس۔ آصفہ بھٹو پارے کہ نن حکومت نا سیوتی مننگ نا ناطہ دا خواست کینہ کہ یوٹیلیٹی اسٹور آک بایدے بندمفس، اودے پین سوگو کننگے۔ اسپیکر وزیر ءِ پارت کرے کہ او دا بارواٹی دیوان اسے نا بست وبند ءِ کے۔ نوید قمر پارے کہ ایوان اٹی بش مرسا باوری کرفنگک و ولدا فیصلہ پین کننگک۔ حفیظ الدین پارے کہ قائمہ کمیٹی ٹی 6 وار دا باوری ءِ کرفنگا کہ یوٹیلیٹی اسٹورآتا بندش ءِ کپننگ انگ ءِ۔ دا الس نا فائدہ نا باندات ءِ دابایدے بند مف۔ رانا تنویر حسین پارے کہ دابارواٹی دیوان اسے نا بست وبند ءِ کینہ۔