وزیر واپار جام کمال خان تون آٹو انڈسٹری نا ڈل انا اوڑدہی

اسلام آباد۔ 13 اگست (اے پی پی) بنجائی وزیر واپار جام کمال خان تون آٹو انڈسٹری نا ڈل اوڑدہی کرے و ہندی آٹو انڈسٹری ءِ متکن آ گاڈی تا درآمد آن بچفنگ نا خواست کرے۔ چارشنبے نادے آ پریس ریلیز نا رداٹ اوڑدہی ٹی بنجائی وزیر واپار آٹو انڈسٹری نا ویل آتا دمدستی ایسری کن کمیٹی اس جوڑ کننگ نا پڑوکرے۔ جام کمال خان پارے کہ کمیٹی ٹی وزارت واپار، ایف بی آر ووزارت صنعت وپیدوار نا نمائندہ غاک اوار مریرہ۔ آٹو انڈسٹری نا ڈل بنجائی وزیر ءِ پارے کہ ہندی آٹو انڈسٹری ءِ متکن آ گاڈی تا درآمد آن بچفنگے۔ بنجائی وزیر ڈل ءِ باوری کرفے کہ آٹو سیکٹر نا شونداری و برآمد آتیکن حکومتی حکمت عملی تیار کننگ انگ ءِ۔ اوپارے کہ ٹیکٹر و موٹرسائیکل آن پد داسہ کارہم برآمد کینہ۔ وزیر واپار آٹو انڈسٹری ءِ پوسکن آ انڈسٹریل پالیسی ٹی اوار مننگ نا سلہ ہم خلک۔ جام کمال پارے کہ آٹو سیکٹر آ ٹیرف بروک آ پنچ سال اٹی پدریسہ کم مریک، امریکہ تون ٹیرف کمتی نا معاہدہ غان آٹو برآمد آتا پوسکن ءُ وارخواہی ودی مسنے۔