معرکہ حق انا سرسہبی آن آجوئی نا جشن یکتا و دوبالا مسنے، عطاءا للہ تارڑ

اسلام آباد۔ 13 اگست (اے پی پی) بنجائی وزیر حوالکاری و شینکاری عطاء اللہ تارڑ پارینے کہ معرکہ حق انا سرسہبی آن آجوئی نا جشن یکتا و دوبالامسنے۔ چارشنبے نادے آ داڑے پارلیمنٹ ہاؤس اٹی میڈیا تون گپ وتران کرسا بنجائی وزیر حوالکاری پارے کہ قوم داوخت آ نئے بیرہ یوم آجوئی نا جشن ءِ اڈتننگ ءِ بلکن معرکہ حق انا سرسہبی نا جشن ءِ ہم پورو جم وجوش اٹ اڈتننگ انگ ءِ۔ اللہ تعالیٰ ننے آجوئی نا نعمت ءِ تس و آجو فضاٹی ساہ ہلنگ نا شرف ءِ تس۔ اسہ سوج اسے نا ورندی ٹی بنجائی وزیر حوالکاری پارے کہ چنکا چناتیان ہلیس بزرگ آتسکان ہرپاکستانی سوز ہلالی بیرک ءِ ہرفسا اُراتیان پیشن پیش تمانو، الس تینا خاہوت آتون اوار پارلیمنٹ ہاؤس تون اوار ایلو اہم ماڑی تا مون آ قومی بیرک آتا سیخانا کیرغ آن خوشی اڈتننگ ءُ۔ اوپارے کہ داوخت آ نن غٹ پاکستانی اُن، بحیثیت پاکستانی قوم نن آجوئی نا جشن ءِ اڈتننگ اُن۔ اوپارے کہ دا جشن بھارت کن ہم اسہ پیدوار ءُ کلہو اسے کہ زندہ قومک تینا آجوئی نا جشن وسرسہبی نا خوشی ءِ ہراوڑاٹ اڈایترہ۔ اوپارے کہ اینو نن نا پورو 12 بجہ غا اسلام آباد تون اوار ملک انا چندی شار تیٹی شاندار آتش بازی نا درشانی ءِ کننگک ہرادے ٹی وی سکرین تیا براہ راست نشان تننگک۔ اسلام آباد اٹی ہم اسہ بھلو دود اس اڈ ہلنگ ءِ، جشن آجوئی نا دود آتیٹی ملی نغمہ و پریڈ ہم اوار مریک۔ عطاءاللہ تارڑ پارے کہ پگہ سہب انا ملک انا چندی ہند آتیا بیرک ءِ چست کننگ نا دود مریک، شکرپڑیاں پریڈ گراؤنڈ اٹی ہم خصوصی دود انا بست وبند کننگانے، ٹی وی اسکرین تیا نن نا ہشت آن دُوانزدہ بجہ اسکان جشن انا دود آک براہ راست نشرمریرہ، مچ آ قوم و مچ آ دنیا اوفتے ہرک۔ بنجائی وزیر حوالکاری مچ آ قوم ءِ جشن آجوئی و معرکہ حق انا سرسہبی نا مبارکبادی ترساپارے کہ دا تاریخی موقع پاکستان نا سیوت، عزم و حوصلہ نا روشنا نشانی ءِ۔ اسہ سوج اسے نا ورندی ٹی اوپارے کہ مری ٹی مروک آ دیوان اٹی ضمنی گچین کاری تا بابت سلابت مسوسس، مریم اورنگزیب ملک آن پیشن ئس و کنا اسہ ایلم اس حلقہ غان اومیتدار ءِ، ہنداسوب آن ای دیوان اٹی شریک مننگ کتوٹ۔