صدر ءِ مملکت تون بنجائی وزیر مذہبی امور نا اوڑدہی

اسلام آباد۔ 12 اگست (اے پی پی) صدر ءِ مملکت آصف علی زرداری تون بنجائی وزیر مذہبی امور سردار محمد یوسف ایوان ءِ صدر اٹی اوڑدہی کرے و اقلیتی حق انا رکھ ، مذہبی رواداری نا مون آ دننگ و بین المذاہب ہم گرنچی آ سرجمی اٹ گپ وتران کرے۔ ایوان ءِ صدر نا پریس ونگ آن سے شنبے نادے آ جاری بیان نا رداٹ صدر ءِ مملکت پارے کہ اقلیت آتا عبادت گاہ تے غیرکانودی کوزہ غان واگزار کرفنگ کن گچین گام گیج آتا گرج ءِ۔ صدر آصف علی زرداری وزارت ءِ مذہبی امور نا اقلیتی برادری نا حق اکن کوشست آتا ستاءِ کرے۔ بنجائی وزیر مذہبی امور سردار محمد یوسف پارے کہ اقلیتی آسودہی فنڈ آن 2 ہزار 236 طالب علم آتے 6 کروڑ روپئی نا تعلیمی وظیفہ تننگانے وخت اس کہ اسہ ہزار 231 ضرورت مند بندغ آتے مالی امداد فراوان کننگا۔ بنجائی وزیرپارے کہ 32 اقلیتی عبادت گاہ تا جوڑ جاڑ و تزئین کن 4 کروڑ 50 لکھ روپئی نا فنڈ جتا کننگانے۔ بنجائی وزیر مذہبی امور و بین المذاہب ہم آہنگی سردار محمد یوسف پارے کہ بیساکھی، گورونانک دیوجی نا سال دے ، کٹاس راج و سادھو بیلا کون آ دود آتیکن آسراتی بے معاوضہ غان فراوان کننگ انگ ءِ۔ بنجائی وزیرپارے کہ خارتس تقریر آتا توننگ کن چندی مذہب آتا عالم دین آتون سلابت کننگک۔ بنجائی وزیر اقلیتی برادری نا ویل آتا ایسری و اوفتا حق انا مون آدننگ اٹ است خواہی و کمکاری آ صدر ءِ مملکت آصف علی زرداری نا منت واری ءِہرفے۔