مزن وزیر شہباز شریف ءَ جائزہ دیوان ءِ سروکی ءَ گلگت بلتستان ءَ 100 میگاواٹ ءِ شمسی توانائی منصوبگ ءَ یک سال ءِ اندر ءَ سرجم کنگ ءِ پنت ءُ شون

اسلام آباد۔12اگست  (اے پی پی): مزن وزیر محمد شہباز شریف ءَ گلگت بلتستان ءَ 100میگاواٹ ءِ شمسی توان ءِ منصوبگ ءَ را یک سال ءِ تہ ءَ سرجم کنگ ءِ پنت ءُ شون داتگ ءُ گوشت کہ اے منصوبگ ءِ سر ءَ وت نگرانی کناں۔ موسمیاتی بدلی ءِ زیانکاریں اثرات ءَ چہ ملک ءَ را رکھینگ ءِ ھاتر ءَ گیش ءَ چہ گیش قابل تجدید وسیلگ توانائی ءِ مکس ءَ ہوار کنگ بہ بنت۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی گلگت بلتستان ءَ 100 میگاواٹ ءِ شمسی توان ءِ منصوبگ ءِ ھوالگ ءَ چار ءُ تپاسی دیوان ءِ سروکی ءَ کت۔ گند ءُ نند ءَ وفاقی وزیر احسن اقبال، احد خان چیمہ ، سردار اویس خان لغاری، مزن وزیر ءِ کوآرڈینیٹر مشرف زیدی، قابل تجدید توانائی ءِ شوبگ ءِ  بلد کار جروین ڈریسمن  ءُ ہمگرنچیں مزنیں حکام ءَ بہر زرتگ۔ گند ءُ نند ءَ گلگت بلتستان ءَ 100میگاواٹ ءِ شمسی منصوبگ ءِ پیشرفت ءُ ایکشن پلان ءِ بابت ءَ سرپد کنگ بوت۔ مزن وزیر ءَ منصوبگ ءِ سرجمی ءِ نگرانی ءِ واستہ جوڑ کتگیں سٹیئرنگ کمیٹی ءِ سروکی وفاقی وزیر برائے بجلی سردار اویس احمد خان لیگاری ءِ دست ءَ دات۔ دیوان ءَ سرپد کنگ بیت کہ منصوبگ ءِ چیر دستی ءَ گلگت ءَ 6، اسکاردو ءَ 8 ءُ ڈائیمر ءَ 6 سولر پارک جوڑ کنگ بیت۔ ہمے رنگ ءَ گلگت ءَ 234، اسکاردو ءَ 179 ءُ ڈائیمر ءَ 68 ماڑی آنی سر ءَ سولر سسٹم ایر کنگ بیت۔ منصوبہ ءِ تہا بیٹری ءِ ایر کنگ ءِ وسیلگ ءَ بیک اپ پاور ءِ دستیاب کنگ ءَ ابید ایشی ءِ ریئل ٹائم مانیٹرنگ ءِ ھاتر ءَ یک سسٹم ءِ ہم جوڑ کنگ بوہگ ءَ انت۔ دیوان ءَ گوشگ بوت کہ اے منصوبگ شش میاں اوستمانی معیار ءِ رد ءَ جوڑ کنگ بیت۔ دیوان ءَ منصوبگ ءِ تخمینہ ءِ ھرچ ءُ درچ ءُ مدت ءِ بابت ءَ سرپدی دیگ بوت۔ مزن وزیر ءَ اے منصوبگ ءِ یکسال ءِ اندر ءَ سرجم کنگ ءِ پنت ءُ شون کتگ۔ مزن وزیر ءَ گوشت کہ گلگت بلتستان ءَ کم ھرچ ءُ درچ ءِ رد ءَ چاگرد دوستیں بجلی ءِ بے رکاوٹیں سپلائی ءِ واستہ اے منصوبگ ءَ را اولیت ءِ بنیاد ءَ سرجمی ءَ چہ سرجمی ءَ عمل کنگ بیت ءُ منصوبگ ءِ سرجمیں بنیاتی ڈھانچہ ءَ را موسمیاتی رد ءَ لیکگ بہ بیت۔ مزن وزیر ءَ گلگت ءِ گوستگیں تر ءُ تاب ءِ ساھت ءَ جار جتگ ات کہ ای سی این ای سی زوت گلگت بلتستان ءِ واستہ 100میگاواٹ ءِ بجلی گس آنی منظوری ءَ دنت۔ مزن وزیر ءَ را گوشگ بوت کہ ای سی این ای سی ءِ نیمگ ءَ گوستگیں روچاں منظوری ءَ پد منصوبگ جوڑیشت ءِ ھوالگ ءَ کار ءِ رفتار ءَ را گیش ترند کنگ بیت۔ مزن وزیر ءَ گوشت کہ منصوبگ ءِ سرجمیں ھرچ ءُ درچ وفاقی حکومت ءِ سر ءَ بیت، اے منصوبگ گلگت ءَ چہ سیاہی ءَ را دور کنگ ءِ واستہ سک باز ارزشت ءِ واھند اِنت۔ مزن وزیر ءَ گوشت کہ گلگت بلتستان ءِ الس آناں 18کلاک ءَ چہ 20کلاک ءِ لوڈ شیڈنگ ءَ چہ رکّینگ ءُ دو دوریں دمگ آناں بجلی پجاری کنگ ءِ واستہ سولرائزیشن جوانیں گیواری اِنت۔ اے منصوبگ ءَ چہ گلگت بلتستان ءِ مردم آناں کم ھرچی ءُ چاگرد دوستیں بجلی رس ایت ۔ مزن وزیر ءَ گوشت کہ پاکستان ءَ موسمی مٹھی ءِ ھرابیں آسر ءَ چہ رکھینگ ءِ واستہ گیشاں چہ گیش قابل تجدید بوھوکیں وسیلگ آناں انرجی مکس ءِ تہ ءَ ھوار کنگ بہ بیت۔ مزن وزیر ءَ پنت ءُ شون کت کہ گلگت بلتستان ءَ ہائیڈل ءُ سولر ذریعہ ءَ چہ بجلی ءِ سپلائی انچیں رنگ ءَ کنگ بہ بیت کہ گرانیں موسم ءِ وھد ءَ بجلی ءِ بندش ءَ چہ مردم آناں ریلیف رس ایت۔ مزن وزیر ءَ گوشت کہ منصوبگ ءِ سر ءَ عمل کنگ ءِ تہ ءَ شفافیت ءَ را دل یکیمی کنگ بہ بیت۔